މި އަހަރުގެ މިހާތަނަށް ރާއްޖެއަށް އެންމެ ގިނައިން ފަތުރުވެރިން އައީ ޗައިނާއިން

މި އަހަރުގެ މިހާތަނަށް ދިވެހިރާއްޖެއަށް އެންމެ ގިނަ އަދަދަކަށް ފަތުރުވެރިން ޒިޔާރަތްކޮށްފައިވަނީ ޗައިނާއިން ކަމަށް ފަތުރުވެރިކަމާއި މަދަނީ އުދުހުންތަކާ ބެހޭ ވުޒާރާގެ އެންމެ ފަހުގެ ތަފާސްހިސާބުތަކުން ދައްކައިފިއެވެ.

ފަތުރުވެރިކަމާ ބެހޭ ވުޒާރާއިން އާންމުކޮށްފައިވާ މައުލޫމާތުތަކަށް ބަލާއިރު، ރާއްޖޭގެ ފަތުރުވެރިކަމުގެ އެއްވަނަ މާކެޓުގެ ގޮތުގައި ޗައިނާ އޮތީ 300,977 ފަތުރުވެރިންނާއެކުގައެވެ. ދެވަނައިގައި 229,236 ފަތުރުވެރިންނާއެކު ރަޝިއާ އޮތްއިރު، ތިންވަނައިގައި އޮތީ 119,968 ފަތުރުވެރިން ޒިޔާރަތްކޮށްފައިވާ އިނގިރޭސިވިލާތެވެ. މީގެ އިތުރުން ލިސްޓުގެ ހަތަރުވަނައިގައި 99,062 ފަތުރުވެރިންނާއެކު ޖަރުމަނުވިލާތް ހިމެނޭއިރު، ފަސްވަނައިގައި އޮތް އިޓަލީވިލާތުން ރާއްޖެއަށް 98,039 ފަތުރުވެރިން ވަނީ ޒިޔާރަތްކޮށްފައެވެ.

ތަފާސްހިސާބުތައް ދައްކާގޮތުން، މިދިޔަ ސެޕްޓެންބަރު މަހު އެކަނިވެސް ރާއްޖެއަށް ޖުމްލަ 150,764 ފަތުރުވެރިން ވަނީ އައިސްފައެވެ. މިއީ މިދިޔަ އަހަރުގެ ސެޕްޓެންބަރު މަހު ރާއްޖެ އައި 151,114 ފަތުރުވެރިންނާ އަޅާބަލާއިރު 0.2 އިންސައްތައިގެ ކުޑަ ދަށްވުމެކެވެ.

 ނަމަވެސް، މިދިޔަ މަހު އެވްރެޖްކޮށް ދުވާލެއްގެ މައްޗަށް 5,872 ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ. އަދި ސެޕްޓެންބަރު މަހުގެ ތެރޭގައި އެންމެ ގިނަ އަދަދަކަށް ފަތުރުވެރިން ޒިޔާރަތްކޮށްފައިވަނީ އެ މަހުގެ 26 ވަނަ ދުވަހުއެވެ. އެ ދުވަހު އެކަނިވެސް ރާއްޖެއަށް 6,284 ފަތުރުވެރިން ވަނީ ޒިޔާރަތްކޮށްފައެވެ.
ރާއްޖެއަށް ޒިޔާރަތްކުރާ ފަތުރުވެރިންގެ އަދަދު މިހާރު މަޑުމަޑުން އިތުރުވަމުން އަންނައިރު، ފަތުރުވެރިކަމުގެ ޕީކް ސީޒަން ނުވަތަ ކުރިއަށްއޮތް ހައި ސީޒަނާއެކު މި އަދަދުތައް އިތުރަށް މައްޗަށް އަރައިގެންދާނެ ކަމަށް ސަރުކާރާއި މި ދާއިރާގެ ހިއްސާދާރުން އުންމީދު ކުރެއެވެ. ސަރުކާރުން މިހާރުވެސް ދަނީ ފަތުރުވެރިކަމުގެ ސިނާއަތް އިތުރަށް ފުޅާކޮށް، އައު މާކެޓުތައް ހޯދުމަށް ގިނަ މަސައްކަތްތަކެއް ކުރަމުންނެވެ.