ފެނަކައާ ހަވާލުކޮށްފައިހުރި މަޝްރޫއުތައް ފެންކުންފުންޏަށް ބަދަލުކުރަނީ
މިމަހުގެ ނިޔަލަށް ބަދަލުކުރުމަށް ދަނީ މަސައްކަތް ކުރަމުން
ފެނަކައާ ހަވާލުކޮށްގެން ރަށްރަށުގައި ހިންގަން ފަށާފައިވާ މަޝްރޫއުތައް އެމްޑަބްލިއުއެސްސީއާ ހަވާލުކޮށްގެން ކުރިއަށް ގެންދަން އިމާރާތްކުރުމާއި ބިނާރާ ބެހޭ ވުޒާރާއިން ނިންމައިފިއެވެ. އެވުޒާރާގެ މިނިސްޓަރ ޑރ.އަބްދުالله މުއަތްލިބި މިއަދު ރައްޔިތުންގެ މަޖިލިހުގައި މެމްބަރަކު ކުރެއްވި ސުވާލަކަށް ޖަވާބުދެއްވަމުން ވިދާޅުވީ އެބަދަލު ގެންނަނީ ފެނަކައަކީ ކޮންސްޓްރެކްޓް މަސައްކަތް ހިންގާ ކުންފުންޏަކަށް ނުވާތީ ކަމަށެވެ. ފެނަކައާ މިދިޔަ ސަރުކާރުން ހަވާލުކުރި ގިނަ މަޝްރޫއުތަކެއް ހުއްޓިފައިވާކަންވެސް ވަޒީރު ފާހަގަކުރެއްވިއެވެ. ވަޒީރު ވިދާޅުވީ ފެނަކައާ ހަވާލުކޮށްފައިވާ މަޝްރޫއުތައް މިމަހުގެ ނިޔަލަށް ފެންކުންފުންޏާ ހަވާލުކުރުމުގެ މަސައްކަތް ކުރައްވަމުން ގެންދަވާ ކަމަށެވެ. އޭގެތެރޭގައި ރަށްރަށުގައި ފަށާފައިހުރި 20 މަޝްރޫއެއް ހިމެނެއެވެ.
"ފެނަކައާ ހަވާލުކޮށްފައި ހުރި މަޝްރޫއުތަކުގެ އެއްބަސްވުންތައް ބާތިލުކުރުމަށްފަހު, އެމްޑިބަލިޔުއެސްސީއާ ވާހަކަދައްކައިގެން ޑައިރެކްޓް ނެގޯޝިއޭޝަނެއްގެ ތެރެއިން އެމްޑަބްލިއުއެސްސީއާ ހަވާލުކޮށްގެން ކުރިއަށް ގެންދިއުން" މިނިސްޓަރ ވިދާޅުވިއެވެ.
އެއްވެސް ރަށެއްގައި ފަށާފައިވާ މަޝްރޫއެއް ހުއްޓާލައިގެން ސަރުކާރުން ނުތިބޭނެ ކަމުގެ ޔަގީންކަން ވަޒީރު ދެއްވިއެވެ. ހުއްޓިފައިވާ މަޝްރޫއުތައް އަލުން ފެށުމަށް މަސައްކަތް ކުރައްވަމުންދާ ކަމަށް ވިދާޅުވިއެވެ.
ރިއެކްޝަންސް
