ރާއްޖޭގެ އެކި ސަރަހައްދުތަކުގައި 6 އައުގާފު އިމާރާތެއް އެޅުމުގެ މަސައްކަތް ބާރުސްޕީޑުގައި ކުރިއަށް

ރާއްޖޭގެ އައުގާފުގެ ދާއިރާ އިތުރަށް ތަރައްގީކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންފައިވާ ވައުދުފުޅާ އެއްގޮތަށް، ރާއްޖޭގެ އެކި ސަރަހައްދުތަކުގައި ހަ އައުގާފު އިމާރާތެއް ތަރައްގީކުރުމުގެ މަސައްކަތް އެކި މަރުހަލާގައި ކުރިއަށްދާކަމަށް އިސްލާމީ ކަންތައްތަކާއި އައުގާފާ ބެހޭ ވުޒާރާއިން ހާމަކޮށްފިއެވެ.

އެމްއެމްޓީވީން މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ހުށަހެޅި ސުވާލުތަކަށް ޖަވާބު ދެއްވަމުން އެ ވުޒާރާއިން ބުނީ، މި ސަރުކާރުން އިސްނަގައިގެން ކުރިއަށްގެންދާ މި މަޝްރޫއުތަކުގެ ތެރެއިން އެންމެ ބޮޑު މަޝްރޫއަކީ ހުޅުމާލޭގައި ބިނާކުރާ "ދާރުއްސަލާމް" އިމާރާތް ކަމަށެވެ. 244.5 މިލިއަން ރުފިޔާ ހަރަދުކޮށްގެން ބިނާކުރާ މި އިމާރާތަކީ އަހަރަކު 52.4 މިލިއަން ރުފިޔާގެ އާމްދަނީއެއް ލިބޭނެ ކަމަށް އަންދާޒާކުރެވޭ ތަނެކެވެ. މިހާރު ކުރިއަށްދަނީ އަމަލީ މަސައްކަތް ފެށުމަށް ބޭނުންވާ ހުއްދަތައް ނެގުމުގެ މަސައްކަތްތަކެވެ. މި އިމާރާތް 730 ދުވަހުގެ ތެރޭގައި ނިންމުމަށް ވަނީ އަމާޒު ހިފާފައެވެ.

މާލޭގައި ތަރައްގީކުރާ "ދާރުލްއަރުގަމް" އަކީ 39.4 މިލިއަން ރުފިޔާގެ މަޝްރޫއެކެވެ. 530 ދުވަހުން ނިންމުމަށް ހަމަޖެހިފައިވާ މި އިމާރާތުގެ ޝީޓް ޕައިލްކުރުމުގެ މަސައްކަތް މިހާރު ފެށިފައިވާއިރު، މިއީ އަހަރަކު 10.8 މިލިއަން ރުފިޔާގެ އާމްދަނީއެއް ލިބޭނެ އިމާރާތެކެވެ.

އަތޮޅުތެރޭގައި ކުރިއަށްދާ މަޝްރޫއުތަކަށް ބަލާއިރު، އައްޑޫ ސިޓީގައި 20 މިލިއަން ރުފިޔާ ހަރަދުކޮށްގެން އަޅާ އިމާރާތަކީ މާލެއިން ބޭރުގައި ހިންގާ އެންމެ އަގުބޮޑު އައުގާފު މަޝްރޫއެވެ. މި އިމާރާތުގެ ކުރެހުމުގެ މަސައްކަތް މިހާރު ކުރިއަށްދާއިރު، މިއީ އަހަރަކު 1.3 މިލިއަން ރުފިޔާގެ އާމްދަނީއެއް ލިބޭނެ ތަނެއްގެ ގޮތުގައި ވަނީ ބެލެވިފައެވެ.

މީގެ އިތުރުން ކުޅުދުއްފުށީ ސިޓީގައި 10 މިލިއަން ރުފިޔާގެ މަޝްރޫއެއް ކުރިއަށްދާއިރު، އެތަނުން އަހަރަކު އެއް މިލިއަން ރުފިޔާގެ އާމްދަނީއެއް ލިބޭނެ ކަމަށް ލަފާކުރެވެއެވެ. ގއ. ވިލިނގިލީގައި އަޅާ އައުގާފު އިމާރާތުގެ ފުރަތަމަ ފަންގިފިލާގެ މަސައްކަތް މިހާރު ފެށިފައިވާއިރު، ގދ. ތިނަދޫގައި އަޅާ އިމާރާތުގެ މަސައްކަތް ފެށުމަށް ބޭނުންވާ ސާމާނު ހޯދުމުގެ މަރުހަލާ ދަނީ ކުރިއަށެވެ. މި ދެ ރަށުގެ އިމާރާތަކީވެސް ކޮންމެ ތަނަކަށް 10 މިލިއަން ރުފިޔާ ހަރަދުކޮށްގެން 540 ދުވަހުގެ ތެރޭގައި ނިންމުމަށް ހަމަޖެހިފައިވާ ތަންތަނެވެ.

އައުގާފު އިމާރާތްތަކަކީ އިސްލާމީ ކަންތައްތަކާ ބެހޭ ވުޒާރާއަށް ދާއިމީ އާމްދަނީއެއް ހޯދުމަށާއި، ދީނީ ކަންކަމަށް ކުރާ ހޭދަ އިތުރުކުރުމަށް ސަރުކާރުން ގެންގުޅުއްވާ މުހިންމު ސިޔާސަތެކެވެ. މި ހަ އިމާރާތް ނިމުމުން ރާއްޖޭގެ އިސްލާމީ ފަންޑަށް ބޮޑު ކުރިއެރުމެއް ލިބިގެންދާނެ ކަމަށް އެ ވުޒާރާއިން ފާހަގަކުރެއެވެ.