އެނާޖީ ޑްރިންކާއި ވޭޕު ފަދަ ތަކެތި އެތެރެކުރާއިރު ލިބޭ ލުއި އަންނަ މަހުން ފެށިގެން ކަނޑާލަނީ
އެނާޖީ ޑްރިންކާއި ވޭޕް ފަދަ ތަކެތި އެތެރެ ކުރުމަށް ގާނޫނުން ލިބޭ ލުއި އަންނަ މަހުން ފެށިގެން ކަނޑާލަން ނިންމާފައިވާ ކަމުގައި ކަސްޓަމްސް އިން ބުނެފި އެވެ.
"ޕީއެސްއެމް" ގެ ރާއްޖެ މިއަދު ޕްރޮގްރާމުގައި ވާހަކަ ދައްކަވަމުން ކަސްޓަމްސްގެ ޑެޕިއުޓީ ޗީފް ސުޕްރިޓެންޑެންޓް އަހުމަދު ނިޔާޒް ވިދާޅުވީ ކަސްޓަމްސްގެ އާންމު ގަވައިދަށް ގެނެވުނު އިސްލާހުގެ ދަށުން މައިގަނޑު ދެ ބަދަލެއް ގެނެސްފައިވާ ކަމަށެވެ.
އެގޮތުން ގެނައި އެއްބަދަލަކީ، ރާއްޖެ އެތެރެ ކުރާ ބައެއް ތަކެތިން ދެމުންއައި އިނާޔަތް އެއްކޮށް ކަނޑާލުމެވެ. އެއި ސިނގިރެޓް ހިމޭނެހެން ދުންފަތުގެ ބާވަތްތަކާއި ވޭޕް ކުރަން ގެންގުޅޭ ސާމާނުތަކުންނާ އަދި އެނާޖީ ޑްރިންކުތައް އެތެރެކުރާއިރު ލިބެމުން އައި އިނާޔަތް އަން އޮގަސްޓު މަހުގެ އެަކަކުން ފެށިގެން ހުއްޓާލުމެވެ.
މިގޮތުން އެލަވަންސް ދިނުން ހުއްޓާލާ ތަކެތީގެ ތެރޭގައި، ސިނގިރޭޓު، ވޭޕް، އެނާޖީ ޑްރިންކް، ޕްލާސްޓިކް ކޮތަޅު، ސިންގަލް ޔޫޒް ޕްލާސްޓި އަދި އެއްގަމު އުޅަނދުފަހަރެވެ.
ދެވަނަ ބަދަލެއްކަމަށް ނިޔާޒް ވިދާޅުވިީ، އަމިއްލަ ފަރާތްތަކުން ގެންނަ މުދަލަށް އެކްސްޕޯޓް އިމްޕޯޓް ގާނޫނުގެ ދަށުން ރައީސަށް ލިބިވަޑައިގަންނަވާ އިހްތިޔާރުގެ ދަށުން ކަނޑައަޅާފައިވާ ޑިއުޓީ މާފުވާ މިންވަރު މަތިކުރުމެވެ.
އެ އިނާޔަތް ގޮތުގައި މީގެ 20 އަހަރު ކުރިން ކަނޑައަޅާފައި އޮންނަނީ މުދަލުގެ އަގުން 20،000ރ. އެވެ. އަދި 2013 ވަނަ އަހަރު އެ އެލަވަންސް 6000ރ. އަށް ބަދަލުކޮށްފަ އެވެ.
ނިޔާޒް ަިތުރަށް ވިދާޅުވި ގޮތުގައި މި ޖުލައި މަހުގެ އެކަކުން ފެށިގެން ޑިއުޓީ މާފްވާ މިންވަރު 10،000ރ. އަށް ބޮޑު ކުރަން ވަނީ ނިންމާފަ އެވެ.
"ޝެއިން ފަދަ ތަންތަނުން އެންމެ ގިނައިން ތަކެތި ގެންނައިރު މި އެލަވަންސް ބޮޑު ކުރުމުގެ އެންމެ ބޮޑު ބޭނުމަކީ އެ ފަދަ ތަކެތި އަވަހަށް ކްލިއާ ކުރުން. ކުރިން 6،000ރ އަށް ލިމިޓު ކޮށްފައި އޮންނަ އިރު ޕާރިސަލްތައް ކަނޑާ ޗެކްކުރަން ޖެހޭ. އެ މަސައްކަތް 10،000ރ. އަށް ލިމިޓު މައްޗަށް ޖައްސާލުމުން ނުހުޅުވައި ޑޮކިއުމަންޓް ހުށަހެޅުމެއް ނެތި ކްލިއާ ކޮށްލާނެ،" ނިޔާޒް ވިދާޅުވި އެވެ.
ނިޔާޒް ތަފްސީލް ދެއްވަމުން ވިދާޅުވީ މިއީ ވިޔަފާރިތަކަށް ކަނޑައެޅިފައިވާ އެލަވަންސްއެއް ނޫން ކަމަށާއި އެހެން ނަމަވެސް އެތެރެ ކުރާ މުދަލުގެ އަދަދަށް ބަލާފައި ވިޔަފާރީގެ ގޮތުގައި ގެންނަ ކަމަށް ބެލެވޭ ތަކެއްޗަށް އެ އިނާޔަތް ނުލިބޭނެ ކަމަށެވެ.
ރިއެކްޝަންސް
