އެޗްޑީސީއަށް ނުލިބުހުރި ފައިސާ ހޯދަން މީގެކުރިން އެކަށީގެންވާ މަސައްކަތްތަކެއް ނުކުރޭ- ފަޒުލް
އެޗްޑިސީއަށް ނުލިބިހުރި ފައިސާގެ އަދަދު 14 ބިލިއަން ރުފިޔާ އަށް އަރާ
ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އަށް ނުލިބުހުރި ފައިސާ ހޯދަން މީގެކުރިން އެކަށީގެންވާ މަސައްކަތްތަކެއް ނުކުރާ ކަމަށް އެކުންފުނީގެ މެނޭޖިންގ ޑިރެކްޓަރ އިބްރާހީމް ފަޒުލް ރަޝީދު ވިދާޅުވެއްޖެއެވެ. މިއަދު މާލިއްޔަތު ކޮމިޓީއަށް މައުލޫމާތު ހިއްސާކުރައްވަމުން ފަޒުލް ވިދާޅުވީ އޭގެ ނަތީޖާއެއްގެ ގޮތުން އެކިފަރާތްތަކުން އެކުންފުންޏަށް ދައްކަން ޖެހޭ 14 ބުލިއަން ރުފިޔާ ނުލިބި އޮތް ކަމަށެވެ. އޭގެ ތެރޭގައި އެކިފަރާތްތަކަށް ދޫކޮށްފައިހުރި ބިމާއި, އިމާރާތްތަކުގެ ކުލި ހިމެނެއެވެ. އަދި ޑިވެލޮޕްމަންޓް އެންޑް ސޭލްސްގެ ގޮތުގައި ލިބެންޖެހޭ ފައިސާވެސް ހިމެނޭ ކަމަށް ފަޒުލް ވިދާޅުވިއެވެ.
ނުލިބި ހުރި ފައިސާގެ ތެރެއިން މިދިޔަ މުއްދަތުގެ ތެރޭގައި 226 މިލިއަން ރުފިޔާ ހޯދުނު ކަމަށް ފަޒުލް ވިދާޅުވިއެވެ. އެޗްޑިސީއަށް ލިބެންޖެހޭ ފައިސާގެ ތެރޭގައި އެކި ކުންފުނިތަކުން ލިބެންޖެހޭ ފައިސާވެސް ހިމެނޭ ކަމަށް އޭނާ ވިދާޅުވިއެވެ.
އެޗްޑީސީއަށް ލިބެންޖެހި ނަމަވެސް ނުލިބު ހުރި ފައިސާ ހޯދުމަށް މަސައްކަތްކުރައްވަމުން ގެންދަވާކަން ފާހަގަކުރައްވާ ފަޒުލް ވިދާޅުވީ ބިލްތައް ހުރި ފަރާތްތަކުން ބިޑްތައް ހުށަހެޅި ނަމަވެސް އިތުރަށް ބަލައިނުގަންނަންވެސް ނިންމާފައިވާ ކަމަށެވެ. ފައިސާ ހޯދުމަށް ތަކުރާރުކޮށް ނޯޓިސް ފޮނުވައިގެންވެސް މަސައްކަތް ކުރައްވަމުން ގެންދަވާ ކަމަށް ފަޒުލް ވިދާޅުވިއެވެ.
" މިއީ ވަރަށް ސިގްނިފިކަންޓް އަދަދެއް. މިއި މަސައްކަތްތަކެއް ނުކުރެވި ހުރުމުގެ ނަތީޖާ އަޅުގަނޑުމެންނާ މިބައްދަލުކުރަނީ" ފަޒުލް ވިދާޅުވިއެވެ.
ރައްޔިތުންގެ މަޖިލިހުގެ މާލިއްޔަތު ކޮމިޓީން މިއަދު އެޗްޑީސީއާ ބައްދަލުކުރެއްވީ ވިޔަފާރި ކުރުމަށް ހައުސިންގ ޑިވެލޮޕްމަންޓް ކޯޕަރޭޝަން ލިމިޓެޑުން ކުއްޔަށް ދޫކޮށްފައިވާ ބިންތަކާއި ޢިމާރާތްތަކުގެ ކުލި ދައްކަމުން ނުގެންދާ މައްސަލައާ ގުޅޭގޮތުން މަޝްވަރާ ކުރުމަށެވެ.
ރިއެކްޝަންސް
