މިހާތަނަށް އެންމެ ގިނައިން ފައިލޭރިއާ ޖެހުނީ އިންޑިއާ މީހުންނަށް
ފައިލޭރިއާ ޓެސްޓުތަކުން އެންމެ ގިނައިން ޕޮޒިޓިވް ވެފައިވަނީ އިންޑިއާގެ ރައްޔިތުން ކަމަށް އެޗް.ޕީ.އޭގެ ތަފާސްހިސާބުން ދައްކައިފި.
ފައިލޭރިއައަށް ޕޮޒިޓިވްވި ނަތީޖާތަކަށް ބަލާއިރު އެންމެ ގިނައީ އިންޑިއާ މީހުން ކަމަށް ރާއްޖޭގެ ހެލްތް ޕްރޮޓެކްޝަން އެޖެންސީ އެޗް.ޕީ.އޭއިން ވިދާޅުވެއްޖެއެވެ.
ފައިލޭރިއާގެ ކޭސްތަކެއް ރާއްޖެއިން ފެނިގެން އެޗް.ޕީ.އޭއިން އަންނަނީ ބިދޭސީ މަސައްކަތްތެރިން ދިރިއުޅެމުން އަންނަ ތަނުގައި ފައިލޭރިއާއަށް ޓެސްޓުކުރަމުންނެވެ.
އެގޮތުން މިހާތަނަށް ހަދާފައިވާ ޓެސްޓުތަކުގެ ނަތީޖާ ދައްކާގޮތުން އެންމެ ގިނަ އަދަދަކަށް ޕޮޒިޓިވް ވެފައިވަނީ އިންޑިއާއަށް ނިސްބަތްވާ މަސައްކަތްތެރިންނެވެ.
އޭގެ ތެރޭގައި ހިމެނެނީ އިންޑިއާގެ އުއްތަރަ ޕްރަދޭޝްގެ 10 މީހަކާއި ބިހާރު 18 މީހެއްގެ އިތުރުން ޓެމިލްނާޑޫގެ މީހެއްގެ އިތުރުން ގޯޕާލް ގަންޖުގެ މީހެކެވެ. ދެން ފައިލޭރިއާއަށް ޕޮޒިޓިވްވެފައިވަނީ ބަންގަލަދޭޝްއަށް ނިސްބަތްވާ 2 މީހެކެވެ.
އެޗް.ޕީ.އޭއިން ވިދާޅުވީ ފައިލޭރިއާއަށް ޓެސްޓުކުރުމުގެ މަސައްކަތް ފުޅާކޮށް ދިވެހިންނާއި ބިދޭސީން ހިމެނޭހެން ކުރަމުން އަންނަ ކަމަށެވެ. އެގޮތުން މިހާތަނަށް 683 މީހަކު ޓެސްޓު ކުރެވި އޭގެ ތެރެއިން 32 މީހަކު ވަނީ މި ބައްޔަށް ޕޮޒިޓިވް ވެފައެވެ.
ފައިލޭރިއާއަށް ޓެސްޓު ކުރި ސަރަހައްދު ތަކުގެ ތެރޭގައި ގްރޭޓާ މާލެ ސަރަހައްދުގައި ހިމެނޭ މާލެ، ހުޅުމާލެ، ވިލިމާލެ، ގުޅީފަޅުގެ އިތުރުން ތިލަފުށްޓާއި ހދ. ކުޅުދުއްފުށި ހިމެނެއެވެ.
ރިއެކްޝަންސް
