މީޑިޔާ ބިލް ކޮމިޓީން ފާސްކޮށްފި
މީޑިޔާ ރެގިއުލޭޓް ކުރުމަށް ތުޅާދޫ ދާއިރާގެ މެމްބަރު އަބްދުލްހަންނާނު އަބޫބަކުރު ރައްޔިތުންގެ މަޖިލިހަށް ހުށަހެޅުއްވި ބިލް މަޖިލިހުގެ ކޮމިޓީން ފާސްކޮށްފިއެވެ.
ބިލް މިނިވަން މުއައްސަސާތަކާބެހޭ ކޮމިޓީން ފާސްކުރީ ވެރިކަންކުރާ ޕީއެންސީގެ މެމްބަރުންގެ ވޯޓުންނެވެ. ކޮމިޓީގައި ހިމެނިވަޑައިގަންނަވާ އެމްޑީޕީ މެމްބަރު މީކާއީލް އަހުމަދު ނަސީމް ބިލް ފާސްކުރަން ވޯޓެއް ނުދެއްވައެވެ. ބިލުން ގިނަ މާއްދާތަކެއް އުނިކަން މީކާއީލް ހުށަހެޅުވުމުން, ތާއީދުކުރައްވާނެ މެމްބަރަކު ނެތުމުން އެއިސްލާހުތަކަށް ވޯޓަކަށްވެސް ނާހައެވެ. ނަމަވެސް ބިލް ފާސްކުރީ ސަރުކާރުން ހުށަހެޅުއްވި ގިނަ އިސްލާހުތަކަކާއެކުއެވެ.
ބިލް ކޮމިޓީން ފާސްކުރެއްވީ ބައެއް ނޫސްވެރިންނާއި, އެމްޑީޕިގެ ބައެއް އެކްޓިވިސްޓުންނާއި, އެނޫންވެސް ބައެއް ފަރާތްތަކުން ކޮމިޓީގައި އަޑުގަދަކޮށް އިހުތިޖާޖު ކުރަމުން ދަނިކޮށެވެ.
ކޮމިޓީން ބިލް ފާސްކުރިއިރު ނޫސްވެރިން ސޮއިކޮށް ހުށަހެޅި ޕެޓިޝަން ކޮމިޓީން ނުބެލުމުންވެސް ނޫސްވެރިން އަޑުގަދަކުރިއެވެ.
ރައްޔިތުންގެ މަޖިލިހުގެ ދައުރުން ބޭރު ޖަލްސާއެއް މާދަމާވެސް ބާއްވަން ނިންމާފައިވުމުން, ބިލް ފާސްކުރުމާމެދު ވޯޓަށް އަހާނެ ކަމަށް ބެލެވެއެވެ.
ރިއެކްޝަންސް
