އެއްދުވަސް ތެރޭގައި ޣައްޒާ ސިޓީން 6000 އަށް ވުރެ ގިނަ މީހުން ވިއްސި ވިހާލި ކޮށްލައިފި
ޣައްޒާ ސިޓީގައި އަދިވެސް 900,000 އެއްހާ މީހުން އެބަތިބި
ޔަހޫދީ ދައުލަތުގެ ސިފައިން ޣައްޒާ ސިޓީގައި ހިންގަމުންގެންދާ އެ ސިޓީ ހިފުމުގެ ވަރުގަދަ އުދުވާނަށް ދެ ހަފްތާ ވެގެންދިޔައިރު އިއްޔެ އަކީ ޣައްޒާގެ ރައްޔިތުންނަށް ވޭންބޮޑު ދުވަހެކެވެ. ރާވައިގެން އުސް އިމާރާތްތަކަށް ބޮންއަޅަމުންގޮސް އާންމުން ހިމާޔަތް ހޯދައިގެންތިބި އަންރްވާގެ ސްކޫލްތަކަށާއި ޓެންޓްތަކަށް އިއްޔެ ބޮންއަޅާ 6,000 ށް ވުރެ ގިނަ މީހުން ވަނީ މަގުމަތިކޮށްލާ ވިއްސި ވިހާލި ކޮށްލާފައެވެ.
އިއްޔެގެ ހަމަލާތަކުގައި އެސަރަހައްދުން އެކަނިވެސް 49 މީހަކު ވަނީ ޣައްޒާ ސިޓީން ޝަހީދުކޮށްލާފައެވެ. އިއްޔެ މުޅި ޖުމްލަ ޣައްޒާއިން ވަނީ 62 މީހަކު ޝަހީދުކޮށްލާފައެވެެ.
"ޣައްޒާ ސިޓީގައި މީޙުން މިހާރު ދިރިއުޅެމުންދަނީ ވަރަށް ދަތި, ބިރުވެރި ހާލަތެއްގައި. ހުއްޓުމެއްނެތި ބޮންއަޅަމުން ދަނީ. ރައްކާތެރިކަމެއް ލިބޭތޯ ދެކުނު އަލް-މަވާސީ އަށް ދަތުރުކުރި އެތައްބަޔަކު އަނބުރާ އަތުވެއްޖެ އެތަނުގައި ފައިޖައްސާލާނެ ތަންކޮޅެއް ނެތިގެން" ފަލަޞްޠީނު މަދަނީ ދިފާއުގެ ތަރުޖަމާނު މަޙްމޫދު ބަސަލް ވިދާޅުވިއެވެ.
އިޒްރާއިލްއިން ވަނީ ޣައްޒާ ސިޓީން މީހުން އެއްކޮށް ނިކުތުމުގެ ވަރުގަދަ އަމުރުތަކެއް ނެރެފައެވެ. ނަމަވެސް ހައިހޫނު ކަމުގެ އިންތިހާގައި ދިރިއުޅޭ ރައްޔިތުން އެތަން ދޫކޮށް ދާނެ ވަކި އެހެންތަނެއް ޣައްޒާގެ ބިމުގައެއް ނެތެވެ.
ޣައްޒާ ސިޓީން ރިޕޯޓްކުރި އަލް ޖަޒީރާގެ ނޫސްވެރިޔާ ހާނީ މަޙްމޫދު ބުނިގޮތުގައި އިޒްރާއިލްގެ ފައިޓަރ ޖެޓްތަކުން ކޮންމެ 10 މިނިޓަކުން ކަހަލަ ގޮތަކަށް ވަރުގަދަ ބޮމުގެ ހަމަލާތަކެއް ދެއެވެ. މީހުން ދިރިއުޅޭ އިމާރާތްތަކަށާއި, ސަރުކާރުގެ އިމާރާތްތަކަށްވެސް މެއެވެ. އެހެންކަމުން ސިޓީ ދޫކޮށް މީހުން ދިއުމުގައިވެސް ރައްކާތެރިކަމެއް ނެތްކަމަށް އޭނާ ބުންޏެވެ.
ރިއެކްޝަންސް
