މެމްބަރު ފަލާހު ދެއްކެވި ވާހަކަ ތަހުގީގު ކުރުމާމެދު ފުލުހުން ޤާނޫނީ ލަފާ ހޯދަނީ
ދޮގު ޚަބަރު ފަތުރާ ނޫސްވެރިން އުލުބައިންދަންވީ ކަމަށް ރައްޔިތުންގެ މަޖިލިހުގެ އިނގުރައިދޫ ދާއިރާގެ މެމްބަރު އިބްރާހީމް ފަލާހު ވިދާޅުވި މައްސަލަ ތަހުގީގު ކުރުމާމެދު ގާނޫނީ ލަފާ ހޯދަން ހުށަހަޅާފައިވާ ކަމަށް ދިވެހި ފުލުހުންގެ ޚިދުމަތުން ވިދާޅުވެއްޖެއެވެ.
ނަމަވެސް ފުލުހުން ވަކި ސީދާ މައްސަލައެއް އަދި މެމްބަރުގެ ނަމެއް ވިދާޅެއް ނުވެއެވެ. ފުލުހުން ވިދާޅުވީ ރައްޔިތުންގެ މަޖިލީހުގެ މެންބަރަކު މަޖިލީހުގެ ތަޅުމުގައި ދައްކާފައިވާ ވާހަކައަކާ ގުޅިގެން މޯލްޑިވްސް ޖާނަލިސްޓްސް އެސޯސިއޭޝަނުން ހުށަހަޅާފައިވާ މައްސަލައެއް ތަހުގީގު ކުރުމާމެދު ގާނޫނީ ލަފައަކަށް އެދި، ޕްރޮސެކިއުޓަރ ޖެނެރަލްގެ އޮފީހަށް ވާނީ ހުށަހަޅާފައިވާ ކަމަށެވެ.
ފުލުހުން ޕީޖީގެ ލަފައައަކަށް އެދުނީ އިއްޔެއެވެ. ޖަރނަލިސްޓް އެސޯސިއޭޝަނުން ފުލުހުންނަށް ހުށަހެޅީ މެމްބަރު ފަލާހު މަޖިލިހުގައި ދެއްކެވި ވާހަކައެއްގެ މައްސަލައެވެ. މެމްބަރު ފަލާހު ވިދާޅުވީ އޭނާ އަކީ އެއްޖިންސުން ގުޅުން ހިންގާ މީހެއްކަމަށް މީޑިޔާގައި ފަތުރާފައިވާ ކަމަށާއި, އެފަދަ ވާހަކަ ފަތުރާނަމަ ނޫސްވެރިން ޖަލަށް ލާންވީ ނޫންކަމަށާއި, އުލު ބައިންދަންވީ ކަމަށް ތަކުރާރުކޮށް ވިދާޅުވިއެވެ.
ޖަރނަލިސްޓް އެސޯސިއޭޝަނުން އެމައްސަލަ ފުލުހުންނަށް ހުށަހެޅީ އަނިޔާވެރިވުމަށް ގޮވާލި ކަމަށް ބުނެއެވެ. ފުލުހުން އޭޖީގެ ލަފާ ހޯދަނީ މެމްބަރަކު މަޖިލިހުގެ ތަޅުމުގައި ދެއްކެވި ވާހަކައަކަށް ވާތީއެވެ. ތަޅުމުގައި ދައްކަވާ ވާހަކަތަކަށް މެމްބަރުންނަށް ވަރަށްބޮޑު އިމްތިޔާޒެއް ލިބެއެވެ.
ފަލާހު އެފަދަ މޭރުމަކުން ވާހަކަދެއްކެވީ މީޑިޔާ ރެގިލޭޓް ކުރުމާ ގުޅޭ ގޮތުން ތުޅާދޫ ދާއިރާގެ މެމްބަރު އަބްދުލް ހަންނާނު އަބޫބަކުރު ހުށަހެޅުއްވި ބިލްގެ ބަހުސްގައެވެ. އެބިލް މަޖިލިހަށް ބަލައިގަތީ ނޫސްވެރިން އިހުތިޖާޖު ކުރަމުން ދަނިކޮށެވެ.
ރިއެކްޝަންސް
