ލޯކަލް ކައުންސިލް އިންތިޚާބުގައި އެމްޑީޕީގެ ޓިކެޓަށް ހުޅުވާލައިފި

ލޯކަލް ކައުންސިލް އިންތިޚާބުގައި އެމްޑީޕީގެ ޓިކެޓްގައި ވާދަކުރަން ބޭނުންވާ ފަރާތްތަކަށް ފުރުޞަތު ހުޅުވާލައިފިއެވެ. އެމްޑީޕީގެ ޓިކެޓްގައި އިންތިޚާބުގައި ވާދަކުރުމުގެ ފުރުޞަތު އިދިކޮޅު އެންމެ ބޮޑު ޕާޓީން ހުޅުވާލީ މިއަދުއެވެ.

އަންނަ އަހަރުގެ ކުރީކޮޅު އޮންނަ ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގައި އެމްޓީޕީގެ ޓިކެޓްގައި ވާދަކުރަން ބޭނުންވާ ފަރާތްތަކުން އެކަމަށް އެދި ހުށަހަޅަން ފުރުޞަތު ދިނީ އަންނަ ސެޕްޓެމްބަރު މަހުގެ 30 ވަނަ ދުވަހުގެ 14:00 ގެ ނިޔަލަށެވެ.

އެމްޑީޕީން ބުނީ ޕްރައިމަރީގައި ވާދަކުރެވޭނީ ޝައުޤުވެރިކަންފާޅުކޮށްފައިވާ ފަރާތްތަކަށް އެކަނި ކަމަށެވެ. ޕްރައިމަރީގެ ޓައިމްލައިން ފަހުން އިއުލާނުކުރާނެ ކަމަށް އެމްޑީޕީން ބުންޏެވެ.

އެމްޑީޕީގެ ޓިކެޓްގައި ވާދަކުރުމަށް އެޕާޓީން ކަނޑައަޅާފައިވާ ޝަރުތު ތަކަކީ:

1- އެމް.ޑީ.ޕީގެ މެމްބަރެއް ކަމުގައިވުން

2- ލޯކަލް ކައުންސިލްތަކުގެ އިންތިޚާބުގެ ޤާނޫނުގެ 12 ވަނަ މާއްދާގައިވާ ގޮތުގެމަތިން އިންތިޚާބަށް ކުރިމަތިލާ މީހެއްގައި ހުންނަންޖެހޭކަމަށް ބަޔާންކުރާ އެންމެހާ ޝަރުޠުތައް ހަމަވުން.

3- އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ޤަވާއިދުގެ 8 ވަނަ މާއްދާގައިވާ ގޮތުގެމަތިން އިންތިޚާބަށް ކުރިމަތިލާ މީހެއްގައި ހުންނަންޖެހޭކަމަށް ބަޔާންކުރާ އެންމެހާ ޝަރުޠުތައް ހަމަވުން.

އެމްޑީޕީގެ ޓިކެޓަށް އެދުމަށް ގޫގުލް ފޯމެއް މެދުވެރިކޮށް ޝައުޤުވެރިކަންފާޅު ކުރެވޭނެ އިންތިޒާމް ވަނީ ހަމަޖައްސާފައެވެ. ފޯމާއެކު ކުށުގެ ރެކޯޑް ހުށަހަޅަން ޖެހެއެވެ.

ސިޓީތަކުގެ ދާއިރާތައް ބެހިފައިވާ ގޮތާއި އަންހެނުންނަށް ޙައްސަ ގޮނޑިކަނޑައެޅުމުގައި މިވަގުތު ބަލަނީ މިވަގުތު އަމަލުކުރަމުންދާ ގޮތަށް ކަމަށް އެމްޑީޕީން ބުންޏެވެ.  އެނޫންގޮތަށް އިލެކްޝަން ކޮމިޝަންގެ އިދާރާއިން ބަދަލުކުރާނަމަ އެބަދަލެއްގެނެވޭނެ ކަން ވަނީ ފާހަގަކޮށްފައެވެ.