ސަޕްލައި ދޯނި ބަންޑުން ޖަހާލައި ހިނގި ހާދިސާގައި އެކަކު ނިޔާވެއްޖެ: ފުލުހުން
ހދ. ކުޅުދުއްފުށިން ށ. ފުނަދޫއަށް ދަތުރުކުރަމުން ދިޔަ ސަޕްލައި ދޯނި ކުމުންދޫ ކައިރިން ބަންޑުން ޖަހާލައި ހިނގި ހާދިސާއެއްގައި އޭގެން ދަތުރުކުރި މީހަކު ނިޔާވެއްޖެއެވެ.
ދޯނިން ދަތުރުކުރި 4 މީހުންގެ ތެރެއިން ނިޔާވީ 66 އަހަރުގެ ދިވެއްސެކެވެ. އޭނާ ނިޔާވީ ސަލާމަތުން ކުޅުދުއްފުށި ސިޓީއަށް ގެންދިޔަ ފަހުންނެވެ. އޭނާ ނިޔާވީ ކުޅުދުއްފުށީ ރީޖަނަލް ހޮސްޕިޓަލަށް ގެންގޮސް ފަރުވާދެމުން ދަނިކޮށް މިއަދު 10:30 ހާއިރު ކަމަށް ހޮސްޕިޓަލާ ހަވާލާދީ ފުލުހުން ވިދާޅުވިއެވެ.
މި ހާދިސާއާ ގުޅިގެން ބަލަންޖެހޭ ކަންކަން އިތުރަށް ބަލަމުންދާކަމަށް ފުލުހުން ވިދާޅުވިއެވެ. އެމްއެންޑީއެފުން މީގެ ކުރިން ވިދާޅުވެފައި ވަނީ މިއަދު ހެނދުނު ހދ. ކުމުންދޫ ކައިރިން ހަތަރު މީހުންނާ އެކު ދަތުރުކުރި ލޯންޗެއް ބަންޑުން ޖަހާލައި، އަނިޔާވި ދެމީހަކަށް ފަރުވާ ދިނުމަށް ކުޅުދުއްފުށްޓަށް ގެންދަން ޖެހެނު ކަމަށެވެ.
ރިއެކްޝަންސް
