ފަރަށްއެރި ދޯންޏަކަށް އެމްއެންޑީއެފުން އެހީތެރިކަން ފޯރުކޮށްދީ ފަޅުވެރިން ސަލާމަތްކޮށްފި
ހއ. އަތޮޅުގައި އޮންނަ މަނަފަރު ރިޒޯޓުން ކުނި ބަރުކޮށްގެން ކ. ތިލަފުއްޓަށް ދަތުރުކުރި "ގުރުވަ 1" ނަމަކަށް ކިޔާ ދޯންޏެއް ނ. ކުޑަރަށް ކައިރިން ފަރަށް އެރުމުން، އެއިން ދަތުރުކުރި މީހުންނަށް އެމްއެންޑީއެފުން އެހީތެރިކަން ފޯރުކޮށްދީފި އެވެ.
އެމްއެންޑީއެފުން ބުނީ މި ހާދިސާގެ މަޢުލޫމާތު އެމްއެންޑީއެފް ނޮދަން އޭރިއާ ކޮމާންޑް ކޯސްޓްގާޑު ފަސްޓް ސްކޮޑްރަންއަށް ލިބިފައިވަނީ ރޭގެ 23:24 ހާއިރު ކަމަށެވެ.
މި ހާދިސާގެ މަޢުލޫމާތު ލިބުމުން އެމްއެންޑީއެފް ނޮދަން އޭރިއާ ކޮމާންޑް ކޯސްޓްގާޑް ފަސްޓް ސްކޮޑްރަންގެ ހާބަރކްރާފްޓް އިން އެ ސަރަހައްދަށް ދަތުރުކޮށް، ދިވެއްސަކާއި ދެ ބިދޭސީންނާ އެކު ދަތުރުކުރި ތިން ފަޅުވެރިން ހާބަރކްރާފްޓްއަށް ނަގާ އެހީތެރިކަން ފޯރުކޮށްދީފައިކަމަށް އެމްއެންޑީއެފުން ބުންޏެވެ. އަދި އެމްއެންޑީއެފްގެ އެހީތެރިކަމާއެކު ފަޅުވެރިން މިއަދު ހެނދުރު 08:45 ހާއިރު ނ. ހޮޅުދޫއަށް ގެންގޮސްދީފައިވާކަމަށާއި, އެ އެންމެންގެ ވެސް ހާލު ރަނގަޅު ކަމަށް އެމްއެންޑީއެފުން ބުންޏެވެ.
އެމްއެންޑީއެފުން އިތުރަށް ބުނީ ފަރަށް އެރި ދޯނި "ގުރުވަ 1" އަށް ވަރަށް ބޮޑަށް ލޮނު އަރާފައިވާކަމަށެވެ. އަދި ދޯންޏަށް އެކިވަރުގެ ގެއްލުންތައް ވެފައިވާ ކަމަށެވެ. މިދުވަސްވަރު މޫސުން ގޯސްވުމުން ކަނޑުދަތުރުފަތުރު ކުރާ ފަރާތްތަކުން މޫސުމަށް ބަލައިގެން ދަތުރު ކުރުމަށް އެމްއެންޑީއެފްއިން ވަނީ އިލްތިމާސްކޮށްފައެވެ.
ރިއެކްޝަންސް
