އިންޑިއާ އާއި ދިވެހިރާއްޖޭގެ ގުޅުން އާ އުސްމިންތަކަކަށް އުފުލިގެންދާނެ- މޯދީ

އިންޑިއާ އާއި ދިވެހިރާއްޖޭގެ ގުޅުން ކުރިއަށް އޮތްދުވަސްތަކުގައި އާ އުސްމިންތަކަކަށް އުފުލިގެންދާނެކަމަށް އިންޑިޔާގެ ބޮޑުވަޒީރު ނަރެންދުރަ މޯދީ ވިދާޅުވެއްޖެއެވެ.

ރާއްޖޭގެ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ދައުވަތަކަށް މިއަދު ރާއްޖެ ވަޑައިގެން ދިވެހި ބަހުން ކުރެއްވި ޓްވީޓެއްގައިން މޯދީ ވިދާޅުވީ ކުރިއަށް އޮތްދުވަސްތަކުގައި ދެގައުމުގެ ގުޅުން އާ އުސްމިންތަކަކަށް އުފުލިގެންދާނެކަން ޔަޤީން.ކަމަށެވެ.

"މާލެ އާދެވިއްޖެ. އަޅުގަނޑަށް މަރްޙަބާ ކިޔުމަށް ރައީސް މުޢިއްޒު އެއަރޕޯޓަށް ވަޑައިގެންނެވުމުން  ވަރަށް އުފާކުރަން. " މޯދީ ޓްވީޓްގައި ވިދާޅުވިއެވެ.

ރާއްޖޭގެ 60 ވަނަ މިނިވަން ދުވަހުގެ ހަރަކާތްތަކުގައި ބައިވެރިވެވަޑައިގަތުމަށް މޯދީ ރާއްޖެ ވަޑައިގަތީ މިއަދުއެވެ. އެނބުރި ވަޑައިގަންނަވާނީ މާދަމާއެވެ. މިދަތުރުފުޅުގައި ދެގައުމުގެ މެދުގައި ރަސްމީ ވާހަކަތައް ކުރިއަށް ގެންދަވާނެއެވެ.

މިސަރުކާރުގެ ކުރީކޮޅު ދެގައުމުގެ ގުޅުން ގޯސްނަމަވެސް އެގުޅުން މިހާރު އަންނަނީ ވަރަށް ބޮޑަށް ބަދަހިވަމުންނެވެ.