އިޒްރާއިލްއިން 20 މަސްދުވަހުގެ ޤަތުލްއާންމުގައި ޣައްޒާގެ 55,000 މީހުން ޝަހީދުކޮށްލައިފި
ފާއިތުވި 24ގަޑިއިރުގެ ތެރެގައިވެސް ވަނީ 120 މީހަކު ޝަހީދުކޮށްލާފަ
އިޒްރާއިލްއިން ޣައްޒާގައި ހިންގަމުންގެންދާ ޤަތުލްއާންމަށް 20 މަސްވެފައިވާއިރު މިއަދާހަމައަށް ފަލަޞްޠީނުގެ 55,000 ރައްޔިތުން ޝަހީދުކޮށްލާފައިވާކަމަށް ޣައްޒާގެ ހެލްތު މިނިސްޓްރީން ބުނެފިއެވެ.
ފާއިތިވި 24 ގަޑިއިރުގެ ތެރޭގައި ޣައްޒާގެ އެކި ސަރަހައްދުތަކަށް ޔަހޫދީ ސިފައިން ދިން ހަމަލާތަކުގައި 120ށް ވުުރެ ގިނަ މީހުން ޝަހީދުވެ, 474 މީހަކު ޒަހަމްވެފައިވާ ކަމަށްވެސް ހެލްތު މިނިސްޓްރީން ވަނީ ކަށަވަރުކޮށްދީފައެވެ.
މިއާއެކު އެހީހޯދުމަށް އެހީ ބަހާ ޕޮއިންޓްތަކުގައި ތިބި މީހުންގެ ގަޔަށް ބަޑިޖަހާ ދިން ހަމަލާތަކުގައިވެސް ޖުމްލަ 224 މީހުން ޝަހީދުވެ, 1,858 މީހަކު ވަނީ ޒަހަމްވެފައެވެ.
މީގެ ތެރެއިން ގިނަ ބަޔަކު ޝަހީދުކޮށްލާއިވަނީ ރޭ ދަންވަރު ނެޓްޒަރިމް ކޮރިޑޯ ސަރަހައްދުގައެވެ. އިޒްރާއިލްގެ އަސްކަރިއްޔާއިން ވަނީ އެސަރަހައްދަށް ބަޑިޖެހިކަމަށް އެއްބަސްވެ އެހާދިސާ ބަލަމުން އަންނަކަމަށް ބުނެފައެވެ.
ނެޓްޒަރިމް ކޮރިޑޯ ކައިރީގައި ގާއިމްކޮށްފައިވާ އެހީ ބަހާ ޕޮއިންޓަށް އެހީ ހޯދުމަށްދިޔަ އިސާމް ވަޙްދާން ވަނީ އޭނާގެ ބޭބެ ގެ ގަޔަށް ޔަހޫދީ ސިފައިން ބަޑިޖަހާ މަރާލިގޮތް އަލްޖަޒީރާއަށް ކިޔައިދީފައެވެ.
"އަަހަރެމެން ވަރަށްގިނަ ފަހަރު އެހީ ލިބޭތޯ ދިޔައިން. އެކަމަކު އެނަސީބެއް ނުލިބުނު. އެހެންވެ އަހަންނާ އަހަރެންގެ ބޭބެ ނިންމީ ދަންވަރު އެތަނަށް ގޮސް ކިއޫގަ ތިބެން. އަހަރެެމެންނަށް ދެވުނުތަނާ މީހުންތަކުގެ ތެރެއަށް ބަޑިޖަހަން ފަށައިފި. އަހަންނަށްކަށް ހަދާނެގޮތެއްވެސް ނޭނގުނު" ވަޙްދާން އާ ހަވާލާދީ އަލްޖަޒީރާގައި ބުނެފައި ވެއެވެ.
ވަޙްދާން ބުނީ ކޮންމެ ގޮތަކުންވެސް އެހީހޯދަން މަޖުބޫރުވެފައިވާ ހާލު އެތަކުގައި މަޑުކުރި ކަމަށާއި ބޭބެގެ ތިންކުދިންވެސް ޓެންޓުގައި ތިބީ ހައިހޫނުކަމުގައި ކަމުގައެވެ. ނަމަވެސް ހަމަލާތަކުގައި ބޭބެގެ ފުރާނަ އެރޭ ދިޔައީ ކަމުގައި އަސަރާއެކު ވަޙްދާން ބުނެފައި ވެއެވެ.
ރިއެކްޝަންސް
