ސުޕްރީމް ކޯޓުގެ ފަނޑިޔާރު ކަމަށް ކުރިމަތިލުމުގެ ފުރުޞަތު ހުޅުވާލައިފި
ސުޕްރީމް ކޯޓުން ހުސްވެފައިވާ ދެ ފަނޑިޔާރުންގެ މަޤާމަށް ކުރިމަތިލުމުގެ ފުރުޞަތު ޖުޑީޝަލް ސަރވިސް ކޮމިޝަން (ޖޭއެސްސީ) އިން ހުޅުވާލައިފައެވެ.
މިކަމާއި ގުޅިގެން ޖޭއެސްސީން ކުރި އިއުލާނެއްގައި ވިދާޅުވީ މި މަޤާމުތަކަށް ކުރިމަތިލުމުގެ އެންމެފަހުގެ ސުންގަޑިއަކީ އަންނަ ބުރާސްފަތި ދުވަހުގެ މެންދުރު 12:00 ކަމަށެވެ.
ސުޕްރީމް ކޯޓުގެ ދެ ފަނޑިޔާރުންގެ މަޤާމު ހުސްވީ ފަނޑިޔާރު ޑރ. އަޒްމިރާލްދާ ޒާހިރާއި ފަނޑިޔާރު މަހާޒް އަލީ އާއި ގުޅޭ ސުލޫކީ މައްސަލައެއްގައި މިދިޔަ ބުރާސްފަތި ދުވަހު އޮތް ރައްޔިތުންގެ މަޖިލިހުގެ ޖަލްސާގައި ދެ ފަނޑިޔާރުން މަގާމުން ވަކިކުރުމާއި ގުޅިގެންނެވެ.
ޖޭއެސްސީން ދެ ފަނޑިޔާރުންނަށް ކޮށްފައިވާ ތުހުމަތަކީ ދަށުކޯޓުގައި އޮތް މައްސަލައަކަށް ނުފޫޒު ފޯރުވުމުގެ ތުހުމަތެވެ. ޖޭއެސްސީން ހުށަހެޅި ރިޕޯޓަކަށް މަޖިލިހުން މި ދެ ފަނޑިޔާރުން ވަކިކޮށްފައިވާއިރު މި ދެފަނޑިޔާރުންވެސް ވަނީ މި ތުހުމަތުތަކަށް އިންކާރު ކުރައްވާފައެވެ.
ދެ ފަނޑިޔާރުން ވަކި ކުރުމާއި ގުޅިގެން ރާއްޖޭއާއި، ރާއްޖެއިން ބޭރުގެ ފަރާތްތަކުން ވަނީ ވަރަށް ބޮޑަށް ކަން ބޮޑުވުންވެސް ފާޅުކުރައްވާފައެވެ.
ރިއެކްޝަންސް
