ރައީސުލްޖުމުހޫރިއްޔާއަށް މަރުގެ އިންޒާރު ދިން މީހާގެ ބަންދަށް 10 ދުވަސް ޖަހައިފި
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ނިސްބަތްކޮށް މަރުގެ އިންޒާރު ދިން މައްސަލައިގައި ހައްޔަރުކުރި ތ. ތިމަރަފުށީ، މަލަސް މަސީޙު މޫސާގެ ބަންދަށް ކްރިމިނަލް ކޯޓުން 10 ދުވަހުގެ މުއްދަތެއް ޖަހައިފި އެވެ.
ފުލުހުންގެ ޚިދުމަތުން ވިދާޅުވީ ކޯޓު އަމުރެއްގެ ދަށުން ރޭގެ ވަގުތެއްގައި ހައްޔަރުކުރެވުނު އުމުރުން 25 އަހަރުގެ މި މީހާގެ ބަންދުގެ މުއްދަތު ޖެހުމަށް ކޯޓަށް ހާޒިރުކުރުމުން 10 ދުވަހަށް ބަންދުގައި ބެހެއްޓުމަށް ކޯޓުން އަމުރުކޮށްފައިވާ ކަމަށެވެ.
މި މައްސަލަ ފެންމަތިވެފައިވަނީ 'މަސީޙް މޫސާ' ނަމުގައި ފޭސްބުކްގައި ހިންގާ އެކައުންޓަކުން ރައީސް މުއިއްޒަށް ހުތުރު ބަސްތަކެއް ބޭނުންކޮށް، މަރުގެ އިންޒާރު ދީފައިވާ ޕޯސްޓެއް ކޮށްގެންނެވެ.
ދިވެހި ފުލުހުންގެ ޚިދުމަތުން ރޭ ވަނީ ސޯޝަލް މީޑިއާގައި ރައީސަށް ނިސްބަތްކޮށް މަރުގެ އިންޒާރު ދިން މައްސަލަ ތަހުޤީޤު ކުރަމުންދާ ކަމަށާއި، އަދި އެ މައްސަލައިގެ ތުހުމަތުގައި މަސީޙު މޫސާ ހައްޔަރުކޮށް، އޭނާގެ ފޯނުވެސް ފުލުހުންގެ ބެލުމުގެ ދަށަށް ގެނެސްފައިވާ ކަމަށް ވިދާޅުވެފައެވެ.
ރިއެކްޝަންސް
