ފުލުހުންނަށް އިތުރު ބާރުތަކެއް ލިބިދޭގޮތަށް ގޭންގު ކުށްތައް ހުއްޓުވުމުގެ ބިލު ފާސްކޮށްފި
ދިވެހި ފުލުހުންނަށް އިތުރު ބާރުތަކެއް ލިބިދޭގޮތަށް ގޭންގު ކުށްތައް ހުއްޓުވުމުގެ ބިލު ރައްޔިތުންގެ މަޖިލީހުން މިއަދު ފާސްކޮށްފިއެވެ.
މިއަދު ބޭއްވި މި ދައުރުގެ އެންމެ ފަހު ޖަލްސާގައި މި ބިލް ފާސްކޮށްފައި ވަނީ 55 މެންބަރުންގެ ވޯޓުންނެވެ. މިބިލް ފާސްކުރުމަށް އެމްޑީޕީއަށް ނިސްބަތްވެ ވަޑައިގަންނަވާ މެމްބަރުން އެއްވެސް ކޮޅަކަށް ވޯޓްދެއްވާފައެއް ނުވެއެވެ.
މި ބިލުގެ ދަށުން، ކޯޓު އަމުރަކާ ނުލައި މީހުން ބަލައި ފާސްކުރުމާއި، ހައްޔަރުކުރުމާއި، އަމިއްލަ ތަންތަން ބަލައި ފާސްކުރުމުގެ ބާރު ފުލުހުންނަށް ލިބިގެންދެއެވެ. އަދި އުޅަނދުފަހަރު ބަލައި ފާސްކުރުމާއި ސާމްޕަލް ނެގުމުގެ ބާރުވެސް ފުލުހުންނަށް ލިބިދެއެވެ.
ބިލުގައި އިންތިޒާމުވެފައިވާ ކުށްކުރާ ގްރޫޕްތައް އުފެއްދުމާއި ހިންގުމަށް ހަރުކަށި އަދަބުތަކެއް ކަނޑައަޅާފައިވެއެވެ. މިގޮތުން، އެފަދަ ގްރޫޕެއް އުފައްދާ ނުވަތަ ހިންގާ ފަރާތްތަކަށް 25 އަހަރުގެ ޖަލު ޙުކުމަކާއި 10 މިލިއަން ރުފިޔާއާ ހަމައަށް ޖޫރިމަނާ ކުރެވިދާނެއެވެ.
ބިލުގައި މަސްތުވާތަކެތި ޓްރެފިކްކުރުމާއި، މީހުން ޓްރެފިކްކުރުމާއި، ނުރައްކާތެރި ކުށްތައް ފަދަ ބޮޑެތި ކުށްތައް ހިމަނާފައިވެއެވެ. އަދި ގޭންގަކަށް ނިސްބަތްވާ މީހުން ކަނޑައެޅުމުގެ މިންގަނޑުތަކެއްވެސް ބިލުގައި ހިމަނާފައިވެއެވެ.
މި ބިލު ތަސްދީގު ކުރެއްވުމާއި އެކު، ގޭންގު ކުށްތައް ހުއްޓުވުމަށް ފުލުހުންނަށް އިތުރު ބާރުތަކެއް ލިބި، އެފަދަ ކުށްތަކަށް ހަރުކަށި އަދަބުތަކެއް ކަނޑައެޅިގެންދާނެއެވެ.
ރިއެކްޝަންސް
