އައިއައިޔޫއެމް އިން އޮނަރަރީ ޑޮކްޓަރޭޓްގެ ޝަރަފް އެރުވި ފުރަތަމަ ބޭފުޅަކަށް ރައީސް ޑރ.މުއިއްޒު
ރައީސުލްޖުމްހޫރިއްޔާ އެޔުނިވަރސިޓީގައި ތަޤުރީރު ކުރެއްވި
އިންޓަރނޭޝަނަލް އިސްލާމިކް ޔުނިވަރސިޓީ މެލޭޝިޔާ (އައިއައިޔޫއެމް) އިން އޮނަރަރީ ޑޮކްޓަރޭޓްގެ ޝަރަފް އެރުވި ފުރަތަމަ ބޭފުޅަކަށް ރައީސް ޑރ.މުއިއްޒު ވެވަޑައިގެންފިއެވެ. އެޔުނިވަރސިޓީން މިޝަރަފް ރައީސުލްޖުމްހޫރިއްޔާއަށް އެރުވީ އެމަނިކުފާނު މިހާރު މެލޭޝިޔާއަށް ކުރައްވަމުން ގެންދަވާ ދަތުރުފުޅުގައި މިއަދު އެޔުނިވަރސިޓީގައި ބޭއްވި ރަސްމިއްޔާތެއްގައެވެ.
މިޝަރަފް ރައީސުލްޖުމްހޫރިއްޔާއަށް އެރުވީ އެޔުނިވަރސިޓީގެ ޕަހަންގ ކޮންސިޓިޓިއުޝަންގެ ހެޑް ޓެންކޫ އަޒީޒާ އައިމިނާ މައިމޫނާ އެވެ. ރައީސުލްޖުމްހޫރިއްޔާއއަށް އެރުވީ ޑޮކްޓަރ އޮފް ފިލޯސަފީއިން އިސްލާމިކް ލީޑަރޝިޕް އެންޑް މަދަނީ ޑުވެލޮޕްމަންޓްގެ ދާއިރާއިންނެވެ.
މިއީ ރާއްޖޭގެ ވަރަށް އިލްމީ ޝަހުސިއްޔަތުންތަކެއް ކިޔަވާވިދާޅުވި ޔުނިވަރސިޓީން މިފަދަ ޝަރަފެއް ދިވެއްސަކަށް އެރުވި ފުރަތަމަ ފަހަރެވެ. އެޔުނިވަރސިޓީން މިޝަރަފް އަރުވާފައި މިވަނީ އެޔުނިވަރސިޓީން ކިޔަވާވިދާޅުވި ބައެއް ދިވެހިން ރައީސުލްޖުމްހޫރިއްޔާއަށް މިޝަރަފް ނާރުވަން ގޮވާލައްވާފައި ވަނިކޮށެވެ.
އެޔުނިވަރސިޓީން ވަނީ ރައީސުލްޖުމްހޫރިއްޔާއަށް ވަރަށް ހޫނު މަރުހަބާއެއްވެސް ދަންނަވާފައެވެ.
ޝަރަފްއެރުވި ރަސްމިއްޔާތުގައި ރައީސުލްޖުމްހޫރިއްޔާ ވަނީ ތަޤުރީރުވެސް ކުރައްވާފައެވެ. މިއީ ދިވެއްސަކު އެޔުނިވަރސިޓީގައި ތަޤުރީރު ކުރެއްވިވެސް ފުރަތަމަ ފަހަރެވެ.
އައިޔޫއެމް އަކީ 300 އަށްވުރެ ގިނަ ދިވެހިން ގްރެޖްއޭޓްވެފައިވާ ޔުނިވަރސިޓީއެވެ. އަދި ރާއްޖޭގެ މަތީތައުލީމަށް ވަރަށްބޮޑު އެހީތެރިކަމެއްވެސް ވެދެއްވާ ޔުނިވަރސިޓީއެކެވެ.
ރިއެކްޝަންސް
