
ނަޝީދު އެނބުރި އެމްޑީޕީއަށް ދަނީބާ, ވާން މިއުޅެނީ ކިހިނެއް!
ޑިމޮކްރެޓްސްއާ ގުޅެން ދެކޮޅު މެމްބަރުންވެސް މަދެއް ނޫން
މިދިޔަ ރިޔާސީ އިންތިޚާބު އޭރުގެ ރައީސް އިބްރާހީމް މުޙައްމަދު ޞާލިހުއަށް ނާކާމިޔާބުވެ, އެމްޑީޕީއަށް ގެއްލުމުގެ މައިގަނޑު ސަބަބަކީ ރައީސް ނަޝީދު އެޕާޓީއާ ދުރަށް ވަޑައިގަތުމެވެ. އެއީ އިއްތިފާގުވުން އޮތް ކަމެކެވެ. ރައީސް ނަޝީދު އެމަނިކުފާނުގެ ވަފާތެރިންނާއެކު އެމްޑީޕީ ދޫކުރައްވާ ދަ ޑިމޮކްރެޓްސް އުފެއްދެވީ އެކަންޏެއް ނޫނެވެ. އެމްޑީޕީއަށް އިންތިޚާބު ކާމިޔާބުވިޔަ ނުދިނުމަށް މަސައްކަތްވެސް ކުރެއްވީއެވެ.
އެމްޑީޕީއަށް ނާކާމިޔާބުވެ, ޕީއެންސީގެ ވެރިކަމެއް އުފެދުނު މައިގަނޑު އެއްސަބަބަކީ އެއީ ކަމަށް ފަހުން ރައީސް ޞާލިހުވެސް އަދި އެމްޑީޕީގެ ޗެއަރޕަސަން ފައްޔާޒު އިސްމާއީލްވެސް ވިދާޅުވިއެވެ. އެޕާޓީގެ ޢާއްމު މެމްބަރުންވެސް ގަބޫލުކުރަނީ ނާކާމިޔާބީގެ އަސްލަނީ 'އިބޫ ނޫންގޮތެއް' ހޯދަން އެމްޑީޕީ ތެރެއިން ރައީސް ނަޝީދާއެކު އިސް ބޭފުޅުންތަކެއް ނިކުންނެވުމެވެ. އޭގެ ތެރޭގައި އޭރު ރައްޔިތުންގެ މަޖިލިހުގެ މެމްބަރުންވެސް ހިމެނިވަޑައިގެންނެވިއެވެ. ޑިމޮކްރެޓްސްގެ ތެރެއިން އުފަންވި ފިކުރަކީ 'ރޫޅާލާނަން' ފިކުރެވެ. ނަތީޖާއަކީ ރިޔާސީ އިންތިޚާބުގައި އެމްޑީޕީއަށް ނާކާމިޔާބުވުމެވެ.
އެކަމަކު މިހާރު އަނެއްކާވެސް މަންޒަރު ބަދަލުވާން ފަށައިފިއެވެ. ބަދަލުވަމުންދާ ކަމުގެ ކުލަތައް އުދަރެހަށް އަރަމުން އައިސް މިއަދު އެކަން މާބޮޑަށް ސާފްވެއްޖެއެވެ. ހަގީގަތުގައި ޑިމޮކްރެޓްސް އުފައްދައިގެން އެމްޑީޕީން ވަކިވި ހަސަން ލަތީފް އާއި މުޙައްމަދު ޝިފާޒު އާއި އަލީ އާޒިމް ފަދަ ބޭފުޅުން އެނބުރި އެމްޑީޕީއާ ގުޅުމާއެކުވެސް މަންޒަރު ސާފްވާން ފަށައިފިއެވެ. ވާން އުޅޭ ގޮތުގެ ތަސްވީރެއް ފެންނަން ފަށައިފިއެވެ.
އެކަމަކު ކުރީގެ ރައީސް މުޙައްމަދު ނަޝީދު މިއަދު ވަނީ ފާޅުގައި އެމަނިކުފާނު އެދިވަޑައިގަންނަވާ ގޮތް ހާމަކުރައްވާފައެވެ. އަދި އެނބުރި އެމްޑީޕީއަށް ވަޑައިގެން ރިޔާސީ ޕްރައިމަރީގައި ވާދަކުރައްވާނެ ކަމުގެ އިޝާރާތަކަށް ވާފަދައިން ވާހަކަ ދައްކަވާފައެވެ.
" އަޅުގަނޑަށް ފެންނަ ގޮތުގައި މިވަގުތު ރާއްޖެއަށާއި, އެމްޑީޕީއަށް އަދި ޑިމޮކްރެޓްސް އަށްވެސް އެންމެ ރަނގަޅު ގޮތަކީ އެމްޑީޕީއާއި ޑިމޮކްރެޓްސް ގުޅުން." އެކްސްގައި ނަޝީދު ވިދާޅުވިއެވެ.
ނަޝީދުގެ އެވާހަކައަށް ތާއީދުކުރެއްވި އެއް ބޭފުޅަކީ ދަ ޑިމޮކްރެޓްސްގެ މިހާރުގެ ރައީސް އިމްތިޔާޒު ފަހުމީއެވެ. މިއަދާ ހަމައަށްވެސް އެމްޑީޕީއަށް ފާޑުވިދާޅުވުން މަތީ ދެމިހުންނެވި އެޕާޓީގެ ކުރީގެ ތަރުޖަމާނު އަދި ރައްޔިތުންގެ މަޖިލިހުގެ މެމްބަރުކަން ތިން ދައުރު ކުރެއްވި އިންތި ވަނީ ނަޝީދުގެ އެހުށަހެޅުއްވުމަށް ތާއީދު ކުރައްވާފައެވެ.
" ރައީސް މުޙައްމަދު ނަޝީދުގެ މި ވިސްނުންފުޅަށް މަރުޙަބާ ދަންނަވަން." އެކްސްގައި އިންތި ވިދާޅުވިއެވެ.
މިއީ ކުލަޖެހިދާނެ ތަސްވީރެއްކަމަށް ބާރު ލިބެނީ އެމްޑީޕީގެ ޗެއަރޕަސަން ފައްޔާޒު އިސްމާއީލްވެސް ނަޝީދުގެ އެހުށަހެޅުއްވުމަށް ތާއީދު ކުރެއްވުމުންނެވެ. އަދަދު ނޫހަށް ފައްޔާޒު ވިދާޅުވީ
ހުރިހާ އެންމެން ގުޅިގެން ވިޔަސް ސަރުކާރު ހަމަ މަގަށް އަޅުވަން އެބަޖެހޭ ކަމަށެވެ.
" އަޅުގަނޑުމެން ޕާޓީން އަބަދުވެސް ގެންގުޅޭ ސްޓޭންޑަކީ އަޅުގަނޑުމެންނާ އެއްކޮށް މިނިވަން ޑިމޮކްރެޓިކް މަސައްކަތް، ދިވެހި ރާއްޖޭގަ ޑިމޮކްރަސީ ދަމަހައްޓަން މަސައްކަތް ކުރަން ތިބި ހުރިހާ ބަޔަކާ އެކުވެސް މަސައްކަތް ކުރުން،" ފައްޔާޒުއާ ހަވާލާދެއްވާ އަދަދު ނޫހުގައި ލިޔެފައި ވެއެވެ.
އެކަމަކު މިވިސްނުމާ ދެކޮޅަށް އެމްޑީޕީގެ ޢާއްމު މެމްބަރުން މަދެއްވެސް ނޫނެވެ. އެމްޑީޕީއަށް ރިޔާސީ އިންތިޚާބު ގެއްލުނީ ރައީސް ނަޝީދުގެ 'ރޫޅާލާލަން' ސްލޯގަންގެ ދަށުން ކަމަށް ގަބޫލުކުރާ ބައެއް އެމްޑީޕީގެ ޢާއްމު މެމްބަރުން ބުނަނީ ޑިމޮކްރެޓްސްއާ ގުޅުން ބަލައިނުގަނެވޭނެ ކަމަށެވެ. ނަޝީދު އެނބުރި އަތުވެއްޖެ ނަމަ އެމްޑީޕީން ވަކިވާނެ ކަމަށްވެސް ބައެއް މެމްބަރުން ވަނީ ބުނެފައެވެ. އެކަމަކު އޭގެ އިދިކޮޅަށް ވާހަކަ ދައްކާ ޢާއްމު ބައެއް މެމްބަރުން ބުނަނީ ދެންވެސް އެމްޑީޕީއަށް ކާމިޔާބު އޮތީ ރައީސް ނަޝީދުވެސް އެނބުރި އައިސް ގުޅިގެން މަސައްކަތް ކޮށްގެން ކަމަށެވެ.
ރައީސް ނަޝީދުގެ އެނބުރި އައުމުގެ އިޝާރާތް އައިސްފައި މިވަނީ ރައީސް ޞާލިހުވެސް ރިޔާސީ ޓިކެޓަށް ވާދަކުރައްވާނެ ކަމަށް ބައެއް މީޑިޔާތަކުން ރިޕޯރޓްކޮށްފައި ވަނިކޮށެވެ. ފައްޔާޒު އިސްމާއީލްވެސް ވަނީ ވާދަކުރައްވާނެކަން އިއުލާނުކުރައްވާފައެވެ. ޕާޓީގެ ރައީސް އަބްދުالله ޝާހިދު އިއުލާނު ނުކުރެއްވިޔަސް ޓީމް ރުކުރުވާލާ މަސައްކަތް ވަނީ ފައްޓަވާފައެވެ. އިތުރު ބައެއް ބޭފުޅުންވެސް ވަނީ މަސައްކަތް ފައްޓަވާފައެވެ.
މިހުރިހާ މަންޒަރު ތަކާއެކު އެމްޑީޕީގެ އެތެރޭގައި އޮތީ ވާދަވެރި ކަމެވެ. އެވާދަވެރިކަން ފަޅައިގެން ނުގޮސް ނިމިދާނެތޯ މިއީ ބޮޑު ސުވާލެކެވެ.
ރިއެކްޝަންސް






