އަމިއްލަ ދަނޑުގައި ފަހުވަގުތު ވެލެންސިއާއިން ރެއާލްއަށް ސިހުމެއް!
ސެޕެނިޝް ލަލީގާގައި މިރޭ ރެއާލް މެޑްރިޑްގެ އަމިއްލަ ދަނޑުގައި ފަހު ވަގުތު ވެލެންސިއާއިން ރެއާލްގެ މައްޗަށް ކުރިހޯދައިފިއެވެ. 2-1 ން ރެއާލް ބަލިވެ ލީގު ހޯދުމުގެ ރޭހުގައި އިތުރު އިންތިޒާރެއް ކުރަންޖެހި, ފުރުޞަތުވެސް ވަނީ ހަނިވެފައެވެ. މެޗުގައި ވިނީޝިއުސް ޖޭއާރު ގެ ޕެނަލްޓީއެއްވެސް ވަނީ ނާކާމިޔާބުވެފައެވެ.
މެޗުގައި ފުރަތަމަ ލީޑު ނެގީވެސް ވެލެންސިއާއިންނެވެ. 15 ވަނަ މިނިޓްގައި އަންދްރޭ އަލަމެއިޑާ ތަނަވަސްކޮށްދިން ފުރުޞަތުގައި ވެލެންސިއާގެ ފުރަތަމަ ގޯލް ކާމިޔާބުކުރީ މޮއޮކްޓަރ ޑައަންކަބީއެވެ.
13 ވަނަ މިނިޓްގައި ވިނީޝިއުސް އަތުން ނާކާމިޔާބުވި ޕެނަލްޓީގެ ބަދަލުގައި މެޗުގެ 50 ވަނަ މިނިޓްގައި ރެއާލަށް ނަތީޖާ އެއްވަރުކޮށްދިނީ ވެސް އޭނާއެވެ. މިއީ އޭނާގެ 200 ވަނަ ލީގު މެޗެވެ.
ސެންޓިއޭގޯ ބާނަބެއު ގައި އޮތް ރެއާލްގެ ބޮޑު ކްރައުޑްގެ އަޑު ކަނޑުވާލީ ވެލެންސިއާގެ ބަދަލުކުޅުންތެރިއެއްގެ ގޮތުގައި ނިކުއިން ހޫގޯ ޑުރޯ މެޗުގެ އިތުރު ވަގުތުގައި ކާމިޔާބުކޮށްދިން ގޯލާއެކުއެވެ. ރެއާލްގެ ކުޅުންތެރިން އަދި ސަޕޯޓަރުންނަށްވެސް ސިހުމެއް ދީ ވެލެންސިއާއިން ފަހުވަގުތު ކާމިޔާބުކުރި ގޯލް ޖެހުމުގައި އެހީތެރިވީ ރަފާ މިރް އެވެ.
ލަލީގާ ތާވަލްގެ ކުރީގައި ރެއާލަށްވުރެ ތިން ޕޮއިންޓް އިތުރަށް ހޯދައިގެން އޮތް ބާސެލޯނާ ހޮނިހިރު ދުވަހު ރެއާލް ބެޓިސްގެ މައްޗަށް ކުރި ހޯދައިފިނަމަ ލީގު ހޯދުމުގެ ރޭހުގައި ރެއާލަށް އިތުރު ގޮންޖެހުންތަކެއް ކުރިމަތިވާނެއެވެ.
މެޗުން ބަލިވި ނަމަވެސް ރެއާލްގެ ކޯޗު ކާލޯ އަންޗޮލޮޓީ ބުނީ ލީގު ހޯދޭނެ ކަމުގެ ފުރުޞަތު އަދިވެސް އެބައޮތް ކަމަށެވެ. ނަމަވެސް އެކަން ހާސިލްކުރަން މިހާރު ވަރަށް އުނދަގޫ ވާނެ ކަމުގައެވެ.
ރިއެކްޝަންސް
