ރައީސް މުޢިއްޒު ޕީއެޗްޑީ ހާސިލްކުރެއްވި ލީޑްސް ޔުނިވަސިޓީއަށް ޒިޔާރަތްކުރައްވައިފި
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިނގިރޭސިވިލާތަށް ކުރައްވަމުންގެންދަވާ ދަތުރުފުޅުގެ ތެރެއިން އެމަނިކުފާނު ޕީއެޗްޑީ ހާސިލްކުރެއްވި ޔުނިވަރސިޓީ އޮފް ލީޑްސްއަށް ޒިޔާރަތްކުރައްވައިފިއެވެ.
ރައީސް އޮފީހުން ވިދާޅުވީ އެ ޔުނިވަސިޓީއަށް ޒިޔާރަތް ކުރެއްވުމުން، ރައީސް މުޢިއްޒަށް މަރުޙަބާ ދެންނެވީ އިނގިރޭސިވިލާތުގެ ޤާނޫނު ހަދާ މަޖިލީހުގެ މެމްބަރު އެލެސް ސޯބްލްއާއި ޔުނިވަރސިޓީގެ ޑެޕިއުޓީ ވައިސް ޗާންސެލަރ ޕްރޮފެސަރ ހެއި ސުވެއިޔޫ ކަމަށެވެ. ރައީސްގެ މި ޒިޔާރަތުގެ ތެރެއިން ބޭއްވުނު ބައްދަލުވުމުގައި ތަޢުލީމީ ދާއިރާ އާއި މަތީ ތަޢުލީމުގެ ފުރުސަތުތަކާ ގުޅޭގޮތުން މަޝްވަރާކުރެވުނު ކަމަށްވެސް ރައީސް އޮފީހުން ވިދާޅުވިއެވެ.
ރައީސް މުޢިއްޒަކީ ޔުނިވަރސިޓީ އޮފް ލީޑްސްގެ އިސް ދަރިވަރެކެވެ. އެމަނިކުފާނު 2009 ވަނަ އަހަރު ސިވިލް އިންޖިނިއަރިންގެ ދާއިރާއިން ޕީއެޗްޑީ ހާސިލު ހާސިލުކުރެއްވީ މި ޔުނިވަރސިޓީންނެވެ.
ޔުނިވަރސިޓީ އޮފް ލީޑްސްއަކީ 1904 ވަނަ އަހަރު އުފެދުނު، އިނގިރޭސިވިލާތުގެ އެންމެ މަތީ ފެންވަރުގެ ޔުނިވަރސިޓީތަކުގެ ތެރެއިން އެއް ޔުނިވަރސިޓީއެވެ.
ރައީސް މުޢިއްޒުގެ މިހާރު އިނގިރޭސިވިލާތަށް ކުރައްވަމުން މިގެންދަވާ ދަތުރުފުޅަކީ ލިވަޕޫލް ފުޓްބޯލް ކްލަބާއި އެމް.އެމް.ޕީ.އާރު.ސީއާ ގުޅިގެން ކުރިއަށްގެންދާ ދިވެހިރާއްޖޭގެ ފަތުރުވެރިކަން އިޝްތިހާރުކުރުމުގެ ކެމްޕޭން ފެށުމުގައި ބައިވެރިވެވަޑައިގަތުމެވެ.
ރިއެކްޝަންސް
