
ސިނގިރޭޓު ވިޔަފާރިކުރާ ފަރާތްތަކުން އެކަން ދޫކޮށްލުމަށް ރައީސް މުޢިއްޒު ގޮވާލައްވައިފި
ސިނގިރޭޓު އެތެރެކޮށް ވިޔަފާރިކުރާ ފަރާތްތަކަށް އެ ވިޔަފާރި ދޫކޮށްލުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގޮވާލައްވައިފިއެވެ.
ރައީސް އޮފީހުން ގެނެސްދޭ "ރައްޔިތުންނާ އެކު" ޕޮޑްކާސްޓްގައި ވާހަކަފުޅު ދައްކަވަމުން ރައީސް ވިދާޅުވީ، ދުންފަތުގެ ބާވަތްތަކުގެ އަގު ބޮޑުކުރުމުގެ މަޤްޞަދަކީ ރައްޔިތުން އެކަމުން ސަލާމަތްކުރުންކަމަށާއި، އަދި ޚާއްޞަކޮށް ޒުވާނުންނާއި ކުޑަކުދިން ދުންފަތުގެ އިސްތިޢުމާލުކުރުމުން ދުރުހެލިކުރުވުމަށް އިސްކަންދެއްވުން ކަމަށެވެ.
މި ސަރުކާރުން ވަނީ ސިނގިރޭޓުން ނަގާ ޑިއުޓީ ދެގުނަކޮށް، ވޭޕް ބޭނުންކުރުން އެއްކޮށް މަނާކޮށްފައެވެ. މިކަމުގެ ސަބަބުން ކުރިން 110 ރުފިޔާއަށް ލިބުނު ސިނގިރޭޓު ފޮއްޓެއްގެ އަގު 240 ރުފިޔާއަށް ވަނީ ބޮޑުވެފައެވެ.
ރައީސް ވިދާޅުވީ ކުރިއަށް އޮތްތަނުގައި ގާނޫނުގެ ދަށުން ދުންފަތުގެ އިސްތިޢުމާލުކުރުން މަނާކުރައްވާނެ ކަމަށެވެ. އަދި މިކަމަކީ އުނދަގޫ ކަމެއްކަން ޤަބޫލުކުރައްވާ ކަމަށާއި، ނަމަވެސް ޒުވާން ޖީލު ސަލާމަތްކުރުމަށްޓަކައި މިކަން ކުރަންޖެހޭ ކަމަށް ރައީސް ވިދާޅުވިއެވެ.
ރައީސް މިފަދައިން ވިދާޅުވި އިރު ސިނގިރޭޓުގެ އަގު ބޮޑުވުމާއި ގުޅިގެން މިފަހަކައިން އައިސް ވަގަށް ސިނގިރޭޓް އެތެރެކުރަން އުޅުމުގެ މައްސަލަތަކެއް ވަނީ ފެންމަތިވެގެން ގޮސްފައެވެ.
ރިއެކްޝަންސް






