ހައްޖަށް ގެންދަން ގުރުއަތުން ހޮވުނު ފަގީރުންގެ ހާލަތު އިތުރަށް ބަލާނަން- މިނިސްޓަރ ޝަހީމް
ހައްޖަށް ގެންދަން ގުރުއަތުން ހޮވުނު ފަގީރުންގެ ހާލަތު އިތުރަށް ބައްލަވާނެ ކަމަށް އިސްލާމިކް މިނިސްޓަރ ޑރ.މުޙައްމަދު ޝަހީމް އަލީ ސައީދު ވިދާޅުވެއްޖެއެވެ. މިނިސްޓަރ ޝަހީމް މިފަދައިން ވިދާޅުވެފައިވަނި ސަރުކާރުގެ ޚަރަދުގައި ހައްޖަށް ގެންދިއުމަށް ގުރުއަތުން ހޮވުނު ފަރާތްތަކުގެ ތެރޭގައި އެފަދަ ހާލަތުގައި ނެތް ބަޔަކު ހިމެނޭ ކަމަށް ބުނަމުންދާތީއެވެ.
ފަގީރު ހާލަތުގައި ނެތް ބަޔަކު ލިސްޓްގައި ހިމެނޭ ކަމަށް ބުނެ, ބައެއް ނަންތައްވެސް ސޯޝަލް މީޑިޔާގައި ބައެއް ފަރާތްތަކުން ގެންދަނީ ދައުރުކުރަމުންނެވެ. މިނިސްޓަރ ޝަހީމް މިއަދު މީޑިޔާތަކަށް ވިދާޅުވީ ސަރުކާރުގެ ޚަރަދުގައި ހައްޖަށް ދާން ފަޤީރުންގެ ދަފްތަރުން ހޮވޭ ފަރާތްތައް ޙައްޖަށް ފޮނުވާނީ އިތުރަށް އެމީހުންގެ ޙާލަތު ބެއްލެވުމަށް ފަހު ކަމަށެވެ. ގުރުއަތުން ހޮވުނު ފަރާތްތަކަކީ ފަޤީރުންގެ ޝަރުޠަށް ފެތޭ ބައެއްކަން ކަށަވަރު ކުރައްވާނެ ކަމަށް ވިދާޅުވިއެވެ.
" މިގޮތުން އެއާ ޚިލާފަށް އޮޅުވާލައިގެން މައުލޫމާތު ދީގެން ދަފްތަރުގައި ޖެހިފައިވާ ކަން ސާބިތު ވެއްޖެ ނަމަ ހައްޖުގެ ފުރުޞަތު ގެއްލޭނެ." މިނިސްޓަރ ވިދާޅުވިއެވެ.
ކޮންމެ އަހަރަކުވެސް ސަރުކާރުގެ ޚަރަދުގައި ފަގީރުންގެ ލިސްޓުން 50 މީހުން ހައްޖަން ގެންދިއުމަކީ ރައީސުލްޖުމްހޫރިއްޔާ ޑރ.މުޙައްމަދު މުއިއްޒުގެ ވައުދެކެވެ. އެގޮތުން ފުރަތަމަ ބެޗް މިދިޔަ އަހަރު ވަނީ ހައްޖަށް ގެންގޮސްފައެވެ. މިއަހަރު ހައްޖަށް ގެންދާ ފަރާތްތައް ވަނީ ގުރުއަތުން ހޮވާފައެވެ.
ރިއެކްޝަންސް
