ހާހެއްހާ މީހުންގެ މަރަށްފަހު ސިރިއާ އިތުރު އަހުލީ ހަނގުރާމައަކަށް ދިޔަނުދޭނެ ކަމަށް އިންތިޤާލީ ރައީސް ވިދާޅުވެއްޖެ
ސީރިއާގެ އިންތިޤާލީ ރައީސް ވަނީ ހަމަލާތަކުގެ ތަޙްޤީގް ފަށާފައި
ސީރިއާ އިތުރު އަހުލީ ހަނގުރާމައަކަށް ގޮސް ރައްޔިތުންގެ ލޭ އޮހޮރުވުމަށް ޖާގަ ނުދެއްވާނެ ކަމަށް ސިރިއާގެ އިންތިޤާލީ ރައީސް އަޙްމަދު އަލް-ޝަރާ ވިދާޅުވެއްޖެއެވެ. ދެ ދުވަސްވަންދެން ސިރިއާގެ ސަލާމަތީ ބާރުތަކާ ވެރިކަމުން ދުރުކޮށްފައިވާ ބައްޝާރުލް އަސަދުގެ ވަފާތެރިންނާ ދެމެދު ހިނގި ކުރިމަތި ލުމުގައި 1,000 އަށްވުރެ ގިނަ މީހުން ވަނީ މަރުވެފައެވެ.
ހާދިސާއަށްފަހު އަލް-ޝަރާ ވަނީ ހާދިސާގައި އާންމުން މެރި މީހުން ޒިންމާދާރުކުރުވުމަށް ތަޙްޤީގެއް ހިންގަން އަންގާފައިވާނެކަމަށް ވިދާޅުވެފައެވެ.
"އެ ހާދިސާ ތަޙްޤީގް ކުރުމަށް މިނިވަން ފެކްޓް ފައިންޑިން ކޮމިޓީއެއް މިހާރުވަނީ އެކުލަވާލެވިފައި" 14 އަހަރުގެ ތެރޭގައި ސީރިއާގައި ހިނގި އެންމެ އަނިޔާވެރި ހަމަނުޖެހުންތަކާ ގުޅިގެން ރައްޔިތުން އިތުރު އަހުލީ ހަނގުރާމައަކަށް ދިއުމަށް ޖާގަ ނުދެއްވާނެކަމަށް ވިދާޅުވެ އާދިއްތަ ދުވަހު ޤައުމާ މުހާތަބުކޮށް ދިން ހިތާބުގައި އަލް-ޝަރާ ވިދާޅުވެފައި ވެއެވެ.
އައްސޭރިފަށުގެ ލަޓާކިއާ އަދި ޓާޓޮސް ސިޓީގައި ބުރާސްފަތި ދުވަހުން ފެށިގެން ހިނގި ހަމަނުޖެހުންތަކުގައި އާންމުގެ 745 މީހަކު މަރުވެފައިވާ ކަމުގައި އިނގިރާސިވިލާތުގައި ހުންނަ ސީރިއަން އޮބްޒްވޭޓްރީ ފޮރ ހިއުމަން ރައިޓްސްއިން ބުނެފައިވެއެވެ. މީހުން މަރާފައިވަނީ ކައިރިން ބަޑި ޖަހައިގެން ކަމަށާއި, ސަލާމަތީ ބާރުތަކުގެ 125 މެމްބަރުންނާއި ހަނގުރާމަނެރިންގެ 148 މީހަކުވެސް މަރުވެފައިވާކަމަށް އެޖަމާއަތުގެ ރިޕޯޓްގައި ވެއެވެ. އަދި އެ ދެ ސިޓީގެ ބޮޑު ސަރަޙައްދަކުން ފެނާއި ކަރަންޓްގެ ޙިދުމަތްވެސް ކަނޑާލާފައިވާކަމުގައި ރިޕޯޓްގައި ފާހަގަކޮށްފައި ވެއެވެ.
ޤައުމާ މުޙާތަބު ކުރައްވާ އަލް-ޝަރާ ވަނީ އަސަދުގެ ސަރުކާރުގެ ވަފާތެރިން ވަގުތުން ވަގުތަށް އަމާންދިނުމަށްވެސް ގޮވާލަފައެވެ. އަދި ލޭއޮހޮރުވުމުގައި އެއްވެސް ދައުރެއް އަދާކުރި ހަމަ ކޮންމެ މީހަކުވެސް އެމީހެއްގެ އަމަލަށް ޒިންމާދާރުކުރުވާނެ ކަމަށް ވަނީ ވައުދުވެފައެވެ.
ކޮމިޓީއިން ހަމަނުޖެހުން ހިނގާދިޔަގޮތް ތަޙްޤީގް ކުރުމަށްފަހު 30 ދުވަހުގެ ތެރޭގައި ރައީސަށް ކަމާގުޅޭ ރިޕޯޓެއް އަރުވަންޖެހޭނެއެވެ.
އަލްޖަރީރާގެ ރިޕޯޓްތައް ބުނާގޮތުން ލަޓްކިއާގައި ހަމަނުޖެހުންތައް ބޮޑަށް ހިނގާފައިވަނީ ޤަރްދާހާ އަވަޑުގައެވެ. ޤަރްދާހާއަކީ އަލް އަސަދްގެ ސަރުކާރުގެ ވެރިކަން އުފަންވި އެމީހުންގެ އެންމެ މުހިއްމު ސަރަޙައްދެވެ.
ރިއެކްޝަންސް
