ލާމަރުކަޒީ ނިޒާމަށް ހަގީގީ ބާރުވެރިކަން ދިނުމަށް ހުއްޓުމެއް ނެތް- ރައީސް ޑރ.މުއިއްޒު

ލާމަރުކަޒީ ނިޒާމަށް ބާރުވެރިކަން ދިނުމަށް ކުރައްވާ މަސައްކަތްތަކަށްހުއްޓުމެއް ނެތްކަމަށް ރައީސުލްޖުމްހޫރިއްޔާ ޑރ.މުޙައްމަދު މުއިއްޒު ވިދާޅުވެއްޖެއެވެ. އެމަނިކުފާނު މިފަދައިން ވިދާޅުވީ ލާމަރުކަޒީ ދުވަހުގެ މުނާސަބަތުގައި ހިއްސާކުރެއްވި މެސެޖްގައެވެ.

ރައީސުލްޖުމްހޫރިއްޔާ ވިދާޅުވީ ރަށްރަށަށް ދަތުރުކޮށް, ކައުންސިލްތަކުގެ އަޑު ސީދާ އަހާ, ރައްޔިތުންނާ ގާތުން ބައްދަލުވެ, ހާލަތު ލޮލުން ދެކި, ލާމަރުކަޒީ ނިޒާމަށް ހަގީގީ ބާރުވެރިކަން ދިނުމަށް ފެއްޓެވި މަސައްކަތަށް ހުއްޓުމެއް ނެތް ކަމަށެވެ. ހުއްޓުމެއް ނެތި އެމަސައްކަތް ދާނީ ކުރިއަށް ކަމަށް ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ގެންދަވަނީ ރައްޔިތުންގެ އަޑު ސީދާ އެއްސެވުމަށް ސިލްސިލާކޮށް ރަށްރަށަށް ދަތުރުކުރައްވަމުނެވެ. އަދި ވެވަޑައިގެންނެވި ވައުދުތައް ފުއްދަވާނެ ކަމުގެ ޔަގީންކަން ދެއްވަމުންނެވެ. ވައުދުތައް ފުއްދެވުމުގައި ސީދާ ރައްޔިތުންގެ ހިޔާލާ މަޝްވަރާ ހޯއްދަވާނެ ކަމަށް ތަކުރާރުކޮށް ދަނީ ވިދާޅުވަމުންނެވެ.