ރަމަޟާން މަހުގެ ހަނދު ސާބިތުކުރުން މި މަހު 28 ގައި
މި އަހަރުގެ ރަމަޟާން މަހުގެ ހަނދު ސާބިތުކުރުން ފެބްރުއަރީ 28 ވާ ހުކުރު ދުވަހު ބޭއްވުމަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ނިންމައިފިއެވެ.
ޑީޖޭއޭ އިން ވިދާޅުވީ ހަނދު ސާބިތުކުރުމުގައި ހެކިބަސް އަދާކުރެވޭނީ މާލޭގައި ނަމަ ކޯޓެއްގެ ޤާޟީއެއްގެ ކުރިމަތީގައި ކަމަށެވެ. އަތޮޅުތެރޭގައިނަމަ މެޖިސްޓްރޭޓް ކޯޓުގެ މެޖިސްޓްރޭޓުގެ ކުރިމަތީގައެވެ. މެޖިސްޓްރޭޓެއް ނެތް ރަށެއްގައިނަމަ ރަށު ކައުންސިލްގެ އިސްވެރިއެއްގެ ކުރިމަތީގައެވެ.
ހަނދު ފެނިއްޖެނަމަ ވީ އެންމެ އަވަހަކަށް މާލޭގައި ނަމަ ޑީޖޭއޭ އަށް، ރަށްރަށުގައި ނަމަ މެޖިސްޓްރޭޓް ކޯޓަށް ނުވަތަ ރަށު ކައުންސިލަށް ހާޒިރުވެ އެކަން އަންގަން ޑީޖޭއޭ އިން ވަނީ އެދިފައެވެ.
ފެބްރުއަރީ 28 ވަނަ ދުވަހުގެ ހަވީރު 5:30 އިން ފެށިގެން ހަނދު ސާބިތުވަންދެން ޑީޖޭއޭ އާއި ރަށްރަށުގެ ކޯޓުތަކާއި ކައުންސިލް އިދާރާތައް ހުޅުވިފައި ހުންނާނެ ކަމަށްވެސް ޑީޖޭއޭ އިން ވިދާޅުވިއެވެ..
ހަނދު ސާބިތުކުރުމާ ގުޅޭ ހެކިބަސް ދިނުމަށް އައުމާއި ދިއުމުގެ ޚަރަދު ދޭ ގޮތަށްވެސް ޑީޖޭއޭ އިން ވަނީ ނިންމަވާފައެވެ.
ކަލަންޑަރުގައިވާ ގޮތުން މިއަހަރުގެ ރަމަޟާން މަހުގެ ފުރަތަމަ ދުވަހަކީ މާރޗު 1 ވާ ހޮނިހިރު ދުވަހެވެ.
ރިއެކްޝަންސް
