ރަށުގެ ތަރައްޤީއަށް ކުރެވޭ ކަންކަމުގައި ހުރިހާ ރައްޔިތުން އެކުވެރިކަމާއެކު ކުރިއަށް ދިއުމަށް ރައީސް އެދިވަޑައިގެންފި
ރަށުގެ ތަރައްޤީއަށް ކުރެވޭ ކަންކަމުގައި ހުރިހާ ރައްޔިތުން އެކުވެރިކަމާއެކު ކުރިއަށް ދިއުމަށް ރައީސުލްޖުމްހޫރިއްޔާ ޑރ.މުޙައްމަދު މުއިއްޒު އެދިވަޑައިގެންފި އެވެ. އެމަނިކުފާނު މިކަމަށް އެދިވަޑައިގަތީ ހއ.އަތޮޅުގެ ބައެއް ރަށްތަކަށް ކުރައްވަމުން ގެންދަވާ ދަތުރުފުޅުގައި ހއ.ދިއްދޫ އަށް ވަޑައިގެން އެރަށު ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.
ރައީސުލްޖުމްހޫރިއްޔާ ވަނީ، ހުރިހާ ރައްޔިތުންވެސް ހެޔޮ ގޮތުގައި ކަންކަމާ މެދު ވިސްނެވުމަށް ވެސް އެދިވަޑައިގެންފައެވެ. އެމަނިކުފާނު ވިދާޅުވީ، ރަށުގެ ތަރައްޤީއަށްޓަކައި ކުރާ ކަންކަމީ އެ ރަށަކުން ގެންދެވޭނެ އެއްޗެއް ނޫން ކަމަށާއި، ސިޔާސީ ކޮންމެ ފިކުރެއްގެ މީހެއް ކަމުގައި ވީ ނަމަވެސް އެކަމުގެ ފައިދާ އޮތީ ރަށުގައި ތިއްބެވި ރައްޔިތުންނަށް ކަމަށެވެ. ރައީސުލްޖުމްހޫރިއްޔާ އެދިވަޑައިގަތީ އަޅުގަނޑުމެން އެންމެންނަކީ ޤައުމުގެ މުސްތަޤުބަލާ މެދުގައި ޤައުމީ ވިސްނުމެއްގައި ވިސްނަވައި، އިސްލާމުން ކަމުގައި ވީތީ އަޅުގަނޑުމެންގެ މައްޗަށް އޮތް ޒިންމާގެ މަތީން ހަނދާންކޮށް، އެކަތިގަނޑަކަށްވެ، ޤައުމައިގެން ކުރިއަށްދާ ބަޔަކަށް ވުމަށެވެ.
ރައީސުލްޖުމްހޫރިއްޔާ ވިދާޅުވީ އެ މަނިކުފާނުގެ ކުރިފުޅުމަތީގައި ހުރިހާ ރައްޔިތުންވެސް ހަމަކަމަށެވެ. ސަރުކާރުން ދޭ ޚިދުމަތްތަކުގައި ތަފާތު ކުރުމެއް ނުގެންގުޅުއްވާ ކަމުގެ ޔަގީންކަން ދެއްވިއެވެ. ރައީސް ވިދާޅުވީ ޚިޔާލު ތަފާތު ވެދާނެ ކަމަށާއި, އެކަމަކު ތަފާތު ޚިޔާލުތައް ފާޅުކުރެއްވުމަށް ފުރުޞަތު އޮންނާނެ ކަމަށެވެ. ޤާނޫނު އަސާސީއިން ކޮންމެ ރައްޔިތަކަށް ލިބިދޭ ޙައްޤެއް، އޭގެ އެންމެ ފުރިހަމަ މިނުގައި ލިބިދީފައި އޮތުމީ އެ މަނިކުފާނުގެ ސަރުކާރުން މިއަދާ ހަމައަށްވެސް ތަންފީޒު ކުރައްވަމުން ގެންދެވި ސިޔާސަތު ކަން ރައީސުލްޖުމްހޫރިއްޔާ ފާހަގަކުރެއްވިއެވެ. އެގޮތުން ބަދަލު ހިއްޕެވުމުގެ ރޫޙެއްގައި ކަމެއް ކުރައްވާފައި ނުވާނެ ކަމަށް ވިދާޅުވެ އެދިވަޑައިގެންނެވީ ޤައުމަށް ހަމަޖެހުން ލިބުމަށެވެ.
ސިޔާސީ ގޮތުން އަނިޔާވެރިވާ މަންޒަރެއް، އެ މަނިކުފާނުގެ ކިބައިން ކުރިއަށް އޮތްތަނުގައިވެސް ފެނިގެންނުދާނެ ކަމުގެ ޔަޤީންކަންވެސް ތަކުރާރުކުރެއްވިއެވެ. އެމަނިކުފާނު މިފަދައިން ވާހަކަދައްކަވާފައި މިވަނީ ދިއްދޫގެ ބައެއް ރައްޔިތުން އެމަނިކުފާނާއި, ސަރުކާރާ ދެކޮޅަށް އަޑު އުފުލާފައި ވަނިކޮށެވެ.
ރިއެކްޝަންސް
