ބިދޭސީން ޢާއްމުކޮށް އެއްވާ ސަރަހައްދުތައް ދާއިމީކޮށް މޮނިޓަރ ކުރަނީ
ބިދޭސީން ޢާއްމުކޮށް އެއްވާ ސަރަހައްދުތައް ދާއިމީކޮށް މޮނިޓަރ ކުރަން ފަށައިފިއެވެ. މޯލްޑިވްސް އިމިގްރޭޝަނުން ބުނީ އެފަދަ ސަރަހައްދުތައް މޮނިޓަރ ކުރަން ފެށީ އާންމު ސަރަހައްދުތަކަށް އެއްވެ އުޅޭ ބިދޭސީންގެ މެދުގައި ފަހަކަށް އައިސް އާއްމު މަސްލަހަތު ގެއްލޭފަދަ ކަންކަން ހިންގަމުންދާކަން ފާހަގަ ކުރެވޭތީ ކަމަށެވެ.
ބިދޭސީން ޢާއްމުކޮށް އެއްވެ އުޅޭ ސަރަހައްދުތައް މޮނިޓަރ ކުރުމުގެ ހަރަކާތް ފެށީ ހުކުރު ދުވަހުއެވެ. ހުކުރު ދުވަހު އިމިގްރޭޝަންގެ އެންފޯސްމަންޓް އެންޑް ކޮމްޕްލަޔަންސް ޑިވިޝަންގެ އޮފިސަރުން ވަނީ އެފަދަ ސަރަހައްދުތައް މޮނިޓަރކޮށްފައެވެ.
" އާއްމު މަސްލަހަތައް ނުރައްކާވާފަދަ މިފަދަ އަމަލުތައް ތަކުރާރުވިއަ ނުދިނުމަށްޓަކައި މި ހަރަކާތް ސިލްސިލާކޮށް ކުރިއަށް ގެންދިއުމަށް ވަނީ ނިންމާފައި." އިމިގްރޭޝަނުން ބުންޏެވެ.
އިމިގްރޭޝަނުން ބުނީ ހަރަކާތްތައް ކުރިއަށްދާއިރު ގަވާއިދާ ހިލާފަށް އުޅޭ ބިދޭސީންގެ މައްސަލައެއް ފާހަގަވެއްޖެނަމަ ޓާސްކުފޯހުން އެފަދަ ބިދޭސީންނާ މެދު ފިޔަވަޅު އަޅާނެ ކަމަށެވެ. އިމިގްރޭޝަނުން މިފަދަ ހަރަކާތެއް ފަށާފައި މިވަނީ ސިލްސިލާކޮށް ބައެއް ސަރަހައްދުތަކުގައި ބިދޭސީންގެ މެދުގައި ހަމަނުޖެހުން ހިންގަމުން ދަނިކޮށެވެ. އަދި އެފަދަ ހަމަނުޖެހުންތަކުގައި ދިވެހިންނާމެދުވެސް މާރާމާރީ ހިންގުމުގެ މައްސަލަތައް ފެންމަތިވެފައި ވަނިކޮށެވެ.
އެފަދަ ބިދޭސީން ޑީޕޯރޓް ކުރުމުގެ މަސައްކަތްވެސް އިމިގްރޭޝަނުން ވަނީ ފަށާފައެވެ.
ރިއެކްޝަންސް
