މާދަމާ އިޒްރާއިލްގެ އަންހެން ސިފައިންގެ ހަތަރު މީހަކު ހަމާސްއިން މިނިވަންކުރަނީ
ހަމަލާތައް މެދުކަނޑާލުމާ ގުޅޭ އެއްބަސްވުމުގެ ދަށުން ހޮނިހިރު ދުވަހު މިނިވަންކުރަން ހަމަޖެހިފައިވާ މީހުންގެ ނަންތައް ހަމާސްއިން ހާމަކޮށްފިއެވެ. އަސީރުން ބަދަލުކުރުމަށް އެއްބަސްވެފައިވާ ގޮތަށް މާދަމާ މިނިވަންކުރުމަށް ހަމަޖެހިފައިވަނީ އިޒްރާއިލް އަސްކަރިއްޔާގެ ހަތަރު އަންހެން ސިފައިންނެވެ.
ހަމާސްއިން މިނިވަންކުރަން ހަމަޖެހިފައިވާ ހަތަރު މީހެއްގެ ނަން ހުކުރު ދުވަހު ހާމަކޮށްފައިވާކަށް އިޒްރާއިލްގެ ބޮޑުވަޒީރުގެ އޮފީހުންވަނީ ހާމަކޮށްފައެވެ. ނަމަވެސް އެއީ ކޮން ބައެއްކަން އަދި އެމީހުންގެ ނަންތައް އިޒްރާއިލް އިން ހާމަކޮށްފައެއް ނުވެއެވެ.
ހޮނިރު ދުވަހު މިނިވަންކުރާ ރަހީނުންގެ ބަދަލުގައި އިޒްރާއިލްގެ ޖަލުތަކުގައި ތިބި ފަލަޞްޠީނުގެ 200 މީހުން މިނިވަން ކުރާނެއެވެ. އެއްބަސްވުމާ އެއްގޮތަށް ހަމާސްއިން މިނިވަންކުރާ އާންމުންގެ ކޮންމެ މީހެއްގެ ބަދަލުގައި އިޒްރާއިލްއިން ދޫކުރުމަށް އެއްބަސް ވެފައިވަނީ ފަލަޞްޠީނުގެ 30 މީހުންނެވެ. އަދި އަންހެން ސިފައިންގެ މީހެއްގެ ބަދަލުގައި 50 ފަލަޞްޠީނުގެ އަސީރުން މިނިވަން ކުރުމަށްވެސް ވަނީ އެއްބަސް ވެފައެވެ.
މިނިވަންކުރާ ރަހީނުންގެ ބަދަލުގައި އިޒްރާއިލްގެ ޖަލުތަކުގައި ތިބި މިޙުންގެ ތެރެއިން 200 މީހުން މިނިވަންކުރާނީ އާދިއްތަ ދުވަހުގެ މެންދުރުފަހުއެވެ. ފުރަތަމަ ބުރުގައި ވަނީ 90 މީހަކު މިނިވަން ކޮށްފައެވެ.
ހޮނިހިރު ދުވަހަކީ ހަމަލާތައް 42 ދުވަހަށް މެދުކަނޑާލުމަށް ވެފައިވާ އެއްވަސްވުމަށް ހަފުތާއެއްވާ ދުވަހެވެ. ހަމާސްގެ އަތްދަށުގައި ތިބި 90 ރަހީނުންގެ ތެރެއިން މި ހަ ފިޔަވަހީގައި ބައިބަޔަށް މިނިވަންކުރުމަށް ހަމަޖެހިފައިވަނީ 33 މީހެކެވެ. ބަދަލުގައި ދެހާހެއްހާ ފަލަޞްޠީނުގެ ރައްޔިތުން އިޒްރާއިލް އިން މިނިވަން ކުރުމަށް ވަނީ އެއްބަސްވެފައެވެ.
އިޒްރާއިލްގެ ސަރުކާރަށް ރަހީނުންގެ އާއިލާތަކުގެ ފިއްތުންތައް ބޮޑުވެ އިޒްރާއިލްއިންވަނީ މިނިވަންކުރާ ރަހީނުންގެ ލިސްޓުގެ ކުރިއަށް ބައެއް އާންމުން ލުމަށް އެދިފައި ކަމުގައި ބައެއް ރިޕޯޓްތައް ބުނެއެވެ. އެކަމަކު އެއީ ކުރިން އެއްބަސްވެވިފައިވާ ގޮތެއް ނޫނެވެ.
ރިއެކްޝަންސް
