ޖަބާލިއާ ރެފިއުޖީ ކޭމްޕްގައި ހުންނަ އަންރްވާގެ ކްލިނިކަކަށް ދިން ހަމަލާގައި 22 މަރު
އުތުރު ޣައްޒާގައި ހުންނަ އދ ގެ ޖަބާލީއާ ރެފިއުޖީ ކޭމްޕްގައި ހުންނަ އަންރްވާގެ ކްލިނިކަކަށް އިޒްރާއިލްއިން ބޮންއަޅާ އެތަނުގައި ޒަޙަމްވެގެން ފަރުވާ ހޯދަމުންދިޔަ 22 މީހަކު ޝަހިދުކޮށްލައިފިއެވެ. އެތަނުގައި ތިބި އަންހެނުންނާއި ކުޑަކުދިންވެސް ހިމެނޭހެން އެންމެ ގަނޑުކޮށް ޝަހީދުކޮށްލިއިރު އެއީ އާންމުންގެ ތެރެއިންވެސް އެންމެ ދަތި ހާލުގައި ތިބި މީހުން ފަރުވާ ހޯދަން ދާތަނެކެވެ.
ޝަހީދުވީ މީހުންގެ ތެރޭގައި 9 ކުޑަކުދިން ހިމެނޭއިރު ދެ ހަފުތާ ނުވާ ތުއްތު ކުއްޖަކުވެސް ހިމެނެއެވެ.
މި ހަމަލާއާ ގުޅިގެން އަންރްވާގެ ވެރިޔާ ފިލިއްޕޭ ލަޒާރިނީ ބުނީ އިޒްރާއިލްއިން ސުންނާފަތިވެފައިވާ ގާކޮޅެއްވިއަސް އަލުން ބޮން އަޅާ ހަލާކު ކުރަމުން ދާ ކަމަށާއި މީހުން ބަލިވެގެން ޝިފާ ހޯދަން އަންނަ ތަންވެސް އެންމެ ފަހުން މި ހެދީ ކަށްވަޅަކަށް ކަމުގައެވެ. އަދި އިޒްރާއިލްއިން ޣައްޒާގައި ހުރިހާ ރޮނގެއް އެތައް ފަހަރެއްގެ މަތިން ހުރަސްކޮށްފައިވާ ކަމަށްވެސް ލަޒާރިނީ ބުނެފައި ވެއެވެ.
ލަޒާރިނީ އިތުރަށް ބުނީ ފާއިތުވި ދެ ހަފުތާއެއްހާ ދުވަހުގެ ތެރޭގައި އެކަނިވެސް އދ ގެ ބޯހިޔާވަހިކަމާއި, ރައްކާތެރިކަން ހޯދަން ދަތުރުކުރު 700 އަށްވުރެ ގިން ފަލަޞްޠީނުގެ ރައްޔިތުން އިޒްރާއިލްއިން ވަނީ މަރާލާފައި ކަމުގައެވެ.
"އަހަރެން އަދި އެއްފަހަރު ގޮވާލަން މިނިވަން ތަޙްޤީގްކުރާ ފަރާތްތަކަށް އިޒްރާއިލްގެ މިފަދަ ސީރިއަސް ކޮންމެ ހަމަލާއެއް ދޭންޖެހޭ އެއްވެސް ސަބަބެއް އޮތްތޯ ބެލުމަށް" މީސްމީޑިއާގެ މަންސަ އެކްސްގައި ކުރި ޕޯސްޓެއްގައި ލަޒާރިނީ ބުނެފައި ވެއެވެ.
ޖަބާލިއާ ރެފިއުޖީ ކޭމްޕަކީ މީގެ ކުރިންވެސް އިޒްރާއިލްގެ ގިނަ ހަމަލާތައް އަމާޒުވެ ވަރަށް ބޮޑަށް ސުންނާފަތިވެފައިވާ އިމާރާތެކެވެ. އެތަނުގައި މިހާރުވެސް 700 އެއްހާ މީހުން ބޯހިޔާވަހިކަން ހޯދައިގެން އެބަތިބިކަމަށް ލަޒާރިނީ ބުނެފައިވެއެވެ.
ޢިޒްރާއިލްއިން ޣައްޒާގައި ޤަތުލްއާންމު ހިންގަންފެށިފަހުން އދ ގެ 300 އިމާރާތެއް މިހާތަނަށް ވަނީ ބިމާ ހަމަކޮށްލާފައެވެ.
ރިއެކްޝަންސް
