55 ކައުންސިލް އިދާރާ ޤާއިމް ކޮށް ނިންމާނީ ފަރުނީޗަރާއެކު – ވަޒީރު
މިއަހަރު އިތުރު 50 ރަށުގެ މަސައްކަތްވެސް ފަށާނެ
55 ކައުންސިލް އިދާރާ ޤާއިމް ކޮށް ނިންމާނީ ފަރުނީޗަރާއެކު ކަމަށް މިނިސްޓަރ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވަރކްސް އާދަމް ޝަރީފް އުމަރު ވިދާޅުވެއްޖެއެވެ. އެމިނިސްޓްރީން އިއްޔެ 55 ރަށެއްގެ ކައުންސިލް އިދާރާ އެޅުމުގެ އެއްބަސްވުމުގައި މެލޭޝިޔާ ކުންފުންޏަކާއެކު ސޮއިކުރެއްވުމާ ގުޅިގެން ބައެއް ތަފްސީލްތައް ދެއްވަމުން ވަޒީރު ވިދާޅުވީ މިއީ 36 މިލިއަން ޑޮލަރުގެ މަޝްރޫއެއް ކަމަށެވެ.
އިއްޔެ މެލޭޝިޔާ ކުންފުންޏަކާއެކު ސޮއިކުރީ 55 ރަށެއްގެ ކައުންސިލް އިދާރާ އެޅުމަށެވެ. އޭގެތެރެއިން 27 ރަށެއްގައި އިމާރާތް އަޅަނީ ދެ ފަންގިފިލައަށެވެ. ދެ ބުރިއަށް އިމާރާތްކުރާ ކައުންސިލް އިދާރާތައް، މަސައްކަތް ފަށާތާ 18 މަސް ދުވަހުގެތެރޭގައި އަދި އެއް ބުރީގެ ޢިމާރާތްތައް މަސައްކަތް ފަށާތާ އެއް އަހަރު ދުވަހުގެތެރޭގައި ނިންމޭނެކަމަށް އުންމީދު ކުރެވޭ ކަމުގައި ވަޒީރު ވިދާޅުވިއެވެ.
އިއްޔެ ސޮއިކުރި 55 ރަށުގައި ކައުންސިލް އިދާރާ އެޅުމުގެ އިތުރުން 50 ރަށެއްގެ ކައުންސިލް އިދާރާ އެޅުމުގެ މަސައްކަތްވެސް މިއަހަރު ފެށޭނެ ކަމަށް ވަޒީރު ވިދާޅުވިއެވެ. ޗައިނާ ސަރުކާރުގެ އެހީގައި ހިންގާ އެމަޝްރޫއާއެކު ކައުންސިލް އިދާރާތަކުގެ %71 މުޅިން އައުކުރެވޭނެކަން ވަޒީރު ފާހަގަކުރެއްވިއެވެ.
ވަޒީރު އާދަމް ޝަރީފް އުމަރު ވިދާޅުވީ 55 ރަށުގެ ކައުންސިލް އިދާރާ އެޅުމުގެ އެއްބަސްވުމުގައި ސޮއިކުރެވުނު ތާރީޚީ ދުވަހަކީ ދިވެހިރާއްޖޭގެ ލާމަރުކަޒީ ނިޒާމުގެ ޙަޔާތުގައި ވަރަށް އުފާވެރި، ލާމަރުކަޒީ ނިޒާމުގައި މުޅިން އައު ޞަފުޙާއެއް ލިޔަން ފެށޭނެ ދުވަހެއް ކަމަށެވެ.
" މާކަނޑުގެ މެދުގައި، ނޫކުލައިގެ ސާލެއްގެ މަތީގައި ފެހިކުލައިގެ މުތީތަކުން ގަތާލެވިފައިވާ ހާރެއްފަދަ ޖަޒީރާ ރަށްތަކުގައި ދިރިއުޅޭ ދިވެހި ރައްޔިތުންނަށް ޚިދުމަތް ދިނުމަށް ކައުންސިލް އިދާރާތަކެއް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ބިނާ ކުރުމުގެ މަޝްރޫޢުގެ އެގްރީމަންޓްގައި ސޮއި ކުރެވުނު އުފާވެރި ދުވަހެވެ." ވަޒީރު ވިދާޅުވިއެވެ.
ވަޒީރު ވިދާޅުވީ ކައުންސިލް އިދާރާތަކެއް ބިނާކުރުމުގެ މި މަޝްރޫޢަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަރަށް ޚާއްޞަ ސަމާލުކަމެއް ދެއްވައިގެން، ސަރުކާރުން ހިންގާ މަޝްރޫޢެއް ކަމަށެވެ. ކައުންސިލްތައް ޢުމްރާނީގޮތުން ތަރައްޤީކުރެއްވުމަށް ވެވަޑައިގެންނެވި ވަޢުދު ރައީސުލްޖުމްހޫރިއްޔާ ފުއްދަވާނެކަން ހާމަވެއްޖެ ކަމަށްވެސް ވަޒީރު ވިދާޅުވިއެވެ.
ކައުންސިލް އިދާރާތައް ބިނާކުރުމުގެ މި މަޝްރޫޢުގެ ސަބަބުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ނަންފުޅު ރާއްޖޭގެ ތާރީޚުގައި، ލާމަރުކަޒީ ނިޒާމުގެ ޞަފުޙާތަކުގައި
ރަންއަކުރުން ލިޔެވޭނެ ކަމަށްވެސް ވަޒީރު ވިދާޅުވިއެވެ.
ކައުންސިލް އިދާރާތައް ބިނާކުރުމުގެ މި މަޝްރޫޢުގެ ސަބަބުން ލާމަރުކަޒީ ނިޒާމު ހަރުދަނާވެ، ކައުންސިލަރުންނަށް މަސައްކަތް ކުރެވޭނެ މާޙައުލެއް އުފެދިގެންދާނެ ކަމަށާއި, ރައްޔިތުންނާ ގާތުން މަސައްކަތް ކުރުމަށް ކައުންސިލްތަކަށް މަގުފަހިވެގެންދާނެކަން ވަޒީރު ފާހަގަކުރެއްވިއެވެ.
ދެ މަޝްރޫއުގެ ތެރެއިން ކައުންސިލް އިދާރާތައް އަޅާނެ ރަށްތައް ސަރުކާރުން ވަނީ އިއުލާނުކުރައްވާފައެވެ.
ރިއެކްޝަންސް
