މެންޗެސްޓަރ ސިޓީން އިޕްސްވިޗް ޓައުން ކޮޅަށް ލަނޑު ގޯންޏެއް ޖަހާ ގަދަ ހަތަރަކަށް
ޕްރިމިއަރ ލީގުގައި އާދިއްތަ ދުވަހު މެންޗެސްޓަރ ސިޓީން އިޕްސްވިޗް ޓައުން ކޮޅަށް 6 ގޯލް ކާމިޔާބުކޮށް ތާވަލްގެ ހަތަރުވަނައަށް ކުރިއަށް ޖެހިލައިފިއެވެ.
ލީގުގެ ގަދަ ހަތަރަކަށް އަލުން އެރި ނަމަވެސް ސިޓީ އަދިވެސް އޮތީ އެއްވަނައިގައި އޮތް ލިވަޕޫލްއާއި 12 ޕޮއިންޓުގެ ބޮޑު ފަރަގަކާއެކުއެވެ. އެއީ 21 މެޗުން 38 ޕޮއިންޓް ހޯދައިގެންނެވެ. ލިވަޕޫލް 50 ޕޮއިންޓާއެކު ތާވަލްގެ އެއްވަނައިގައި އޮތީ ތާވަލްގެ ގަދަ ފަހެއްގައި ހިމެނޭ ހުރިހާ ޓީމަކަށްވުރެ އެއްމެޗު މަދުން ކުޅެގެންނެވެ. ދެވަނަ އަދި އިންވަނައިގައި އޮތް ދެޓީމުވެސް އޮތީ 44 ޕޮއިންޓް ހޯދައިގެންނެވެ.
ޕޯޓްމަން ރޯޑްގައި ކުޅުނު މެޗު ފެށިގެންގެން ނިމެންދެންވެސް ސިޓީންވަނީ މެޗު ޑޮމިނޭޓް ކޮށްގެން ކުޅެފައެވެ. ސިޓީއަށް 27 ވަނަ މިނިޓްގައި ލީޑު ނަގައިދިނީ ފިލް ފޯޑެން އެވެ. ސިޓީގެ ދެވަނަ ގޯލް މަޓެއޯ ކޮވަސިޗް ކާމިޔާބުކޮށްދިނީވެސް 30 ވަނަ މިނިޓްގައި ފޯޑެން ތަނަވަސްކޮށްދިން ފުރުޞަތެއްގައެވެ.
ފޯޑެން ވަނީ މެޗުގައި އިތުރު ގޯލެއްވެސް ކާމިޔާބު ކޮށްފައެވެ. ފުރަތަމަ ހާފު ނިމުމުގެ ކުރިން ސިޓީގެ ތިންވަނަ ގޯލް 42 ވަނަ މިނިޓްގައި ކާމިޔާބުކޮށްދިނީ ކެވިން ޑީބްރޭނާ ތަނަވަސްކޮށްދިން ފުރުޞަތެއްގައެވެ. ސިޓީން ފުރަތަމަ ހާފު ނިންމާލީވެސް 3-0 ގެ ލީޑެއްގައި އޮވެއެވެ.
ދެވަނަ ހާފު ފެށިގެން ހަތަރު ވަނަ މިނިޓްގައި ޖެރެމީ ޑޮކޫ ވަނީ ސިޓީއަށް ހަތަރުވަނަ ގޯލް ކާމިޔާބުކޮށްދީފައެވެ. އެއީވެސް ކެވިން ޑީބްރޭން ތަނަވަސްކޮށްދިން ފުރުޞަތެއްގައެވެ. ޑޮކޫ ވަނީ ސިޓީއަށްފަސްވަނަ ގޯލް ކާމިޔާބުކުރުމުގައި އެހީތެރި ވެފައެވެ. 57 ވަނަ މިނިޓްގައި ސިޓީގެ ފަސްވަނަ ގޯލް ކާމިޔާބު ކުރީ ފާއިތުވި ހަފުތާގައި ސިޓީގެ އެއްބަސްވުން 2034 ވަނަ އަހަރާ ހަމައަށް އާކުރި އާލިންގ ހާލަންޑްއެވެ.
ސިޓީގެ ފަހު ގޯލް ކޮވަސިކް ތަނަވަސްކޮށްދިން ފުރުޞަތުގައި 69 ވަނަ މިނިޓްގައި ކާމިޔާބުކޮށްދިނީ ބަދަލު ކުޚުންތެރިއެއްގެ ގޮތުގައި ނިކުއިން ހަމޭސް މެކްއަޓީއެވެ
ރިއެކްޝަންސް
