އެސްޓޯނިއާ ދަތުރުގެ އެންމެ މުހިއްމު ބަޔަކީ ރާއްޖޭގެ ޑިޖިޓަލް ނިޒާމް ހަރުދަނާކުރުން- ރައީސް މުއިއްޒު
އެސްޓޯނިއާ ދަތުރުގެ އެންމެ މުހިއްމު ބަޔަކީ ރާއްޖޭގެ ޑިޖިޓަލް ނިޒާމް ހަރުދަނާކުރުން ކަމަށް ރައީސުލްޖުމްހޫރިއްޔާ ޑރ.މުޙައްމަދު މުއިއްޒު ވިދާޅުވެއްޖެއެވެ. އެމަނިކުފާނު މިފަދައިން ވިދާޅުވީ އެސްޓޯނިއާ އަށް ކުރެއްވި ރަސްމީ ދަތުރުފުޅު ނިންމާލެއްވުމަށްފަހު ފުރާވަޑައިގެންނެވުމުގެ ކުރިން ކުރެއްވި ޓްވީޓެއްގައެވެ.
ރައީސުލްޖުމްހޫރިއްޔާ ވިދާޅުވީ އެސްޓޯނިއާގެ އީޖާދީ, ޑިޖިޓަލް ބަދަލުވުމަކީ ހަރުދަނާ އަދި ދެފުށް ފެންނަ ވެރިކަމެއް ހިންގުމުގައި ދުނިޔޭގެ ފެންވަރުގައި ފާހަގަކުރެވޭ ނަމޫނާއެއް ކަމަށެވެ. ރާއްޖޭގެ އަމާޒަކީވެސް ޑިޖިޓަލް ނިޒާމް ހަރުދަނާކުރުންކަން ފާހަގަކުރައްވާ, އެސްޓޯނިއާގެ އީޖާދީ ކުރިއެރުންތައް ބަލާ ތަޖުރިބާ ކުރުމުގެ ފުރުޞަތު ފަހިކޮށްދެއްވީތީ ޝުކުރު އަދާކުރެއްވިއެވެ.
ދަތުރުފުޅު ނިންމަވާލައްވަމުން ޕީއެސްއެމްއަށް ދެއްވި އިންޓަރވިއުއެއްގައި ރައީސުލްޖުމްހޫރިއްޔާ ވަނީ މިދައުރުގެ ތެރޭގައި ތައުލީމީ އަދި ޞިއްހީ ދާއިރާ ޑިޖިޓަލް ކުރައްވާނެ ކަމަށްވެސް ވިދާޅުވެފައެވެ.
އެސްޓޯނިއާގެ ރައީސް ދެއްވި ދައުވަތަކަށް އެގައުމަށް ކުރެއްވި ދަތުރުފުޅުގެ ތެރެއިން ދެގައުމުން ވަނީ ޑިޖިޓަލައިޒޭޝަން, ތިމާވެށި ސިޔާސީ މަޝްވަރާތަކުގެ ދާއިރާއިން އެއްބަސްވުންތަކުގައި ސޮއިކުރައްވާފައެވެ. އެއެއްބަސްވުންތަކާއި, ތަފާތު ދާއިރާތަކުން ކުރެއްވި މަޝްވަރާތަކަށް އިޝާރާތްކުރައްވާ ރައީސުލްޖުމްހޫރިއްޔާ ޑރ.މުޙައްމަދު މުއިއްޒު ވިދާޅުވީ މިދަތުރުފުޅަކީ ދެގައުމުގެ ގުޅުމުގެ އާ ދައުރެއްގެ ފެށުން ކަމަށެވެ.
ރިއެކްޝަންސް
