ފަހު ވަގުތު އަމަޑްގެ ހެޓްރިކާއެކު ޔުނައިޓަޑަށް މޮޅެއް
ފަހު ވަގުތު އަމަޑް ޑައަލޯ ކާމިޔާބުކޮށްދިން ހެޓްރިކާއެކު އެކު 3-1 ން މެންޗެސްޓަރ ޔުނައިޓަޑް އިން ސައުތަމްޕްޓަންގެ މައްޗަށް ކުރި ހޯދައިފިއެވެ.
އޯލްޑް ޓްރެފޯޑްގައި ކުޅުނު މެޗުގައި ބައިކޮޅަށް ވަން ގޯލަކާއެކު މެޗުގެ 80 ވަނަ މިނިޓާ ހަމައަށްވެސް ލީޑުކުރަމުން ދިޔައީ ސައުތަޕްޓަން އިންނެވެ. ނަތީޖާ ބަދަކުރަން ޔުނައިޓަޑުން މަސައްކަތް ކުރި ނަމަވެސް ގޯލެއް ކާމިޔާބު ނުކުރެވި އުޅެނިކޮށް ޔުނައިޓަޑް އަށް ހަމަޖެހުމެއް ލިބުނީ 81 ވަނަ މިނިޓްގައި އަމަޑް ގޯލެއް ކާމިޔާބުކޮށް ކުރި ހިސާބުންނެވެ.
ފާއިތުވި ހަފުތާގައި ޔުނައިޓަޑާއެކު ސޮއިކޮށްފައިވާ އެއްބަސްވުން ފަސްއަހަރަށް އިތުރުކުރި އަމަޑް ވަނީ އޭގެ 9 މިނިޓްފަހުން ދެވަނަ ގޯލެއްވެސް ކާމިޔާބުކޮށްފައެވެ. ލީޑު ފުޅާކުރުމުގައި އޭނާއަށް އެހީތެރިވީ ކްރިސްޓިއަން އެރިކްސަން އެވެ.
ކުޑަ ދުވަސްކޮޅޭއްގެ ތެރޭގައި ކޯޗު ރުބެން އަމޮރިމްގެ ޕްލޭންގެ އެންމެ މުހިއްމު އެއް ކުޅުންތެރިޔާ ވަނީ މެޗުގެ ފުރިހަމަ ވަގުތު ހަމަވެ އިތުރު ވަގުތުގެ ހަތަރުވަނަ މިނިޓްގައި ގޯލްޖަހާ ހެޓްރިކް ހަދާފައެވެ.
ދަށް ނަތީޖާތަކާއެކު ޕްރިމިއަރ ލީގުގެ ތާވަލްގެ ވަރަށް ފަހަތަށް ސޮއްސާލާފައިވާ ޔުނައިޓަޑް އަށް އެންމެ 12 މިނިޓްގެ ތެރޭގައި 3 ގޯލް ކާމިޔާބުކޮށްދިނުމާއި އެކު އަމޮރިމްވަނީ އެކަމާ މެދު ހިތްހަމަޖެހިގެން ވާހަކަދައްކާފައެވެ. އޭނާބުނީ އޯލްޑް ޓްރެފޯޑްގައި އާދިއްތަ ދުވަހު ބްރައިޓަންއާ ބައްދަލުކުރާ މެޗަށް އަމަޑް މުހިއްމު ކަމަށާއި ބޮޑު ކްލަބެއްގައި ޒުވާން ކުޅުންތެރިއަކު ހެޓްރިކެއް ހެދުމަކީ އޭނާގެ މުސްތަގުބަލަށް ރަނގަޅު ކަމެއްކަމަށެވެ.
"އޭނާ އަހަރެމެންނަށް އެހީވީ, އަދި މިސީޒަންގައި އޭނާ އަންނަނީ ރަނގަޅު ކުޅުމެއް ދައްކަމުން. އަހަރެން އޭނާއަށް މަރުހަބާ ކިޔަން" އަމޮރިމް ބުނެފައި ވެއެވެ.
މެންޗެސްޓަރ ޔުނައިޓަޑް މިވަގުތު އޮތީ 21 މެޗުން 26 ޕޮއިންޓާއެކު ތާވަލްގެ 12 ވަނައިގައެވެ. ހަމަ އެ އަދަދަށް މެޗު ކުޅޭ ސައުތަމްޕްޓަން ތާވަލްގެ ފުލުގައި އޮތީ ހަ ޕޮއިންޓާއެކު އެވެ.
ރިއެކްޝަންސް
