ހިޖުރަ ގްރޫޕްގެ ހުއްދަ ބާޠިލްކޮށް, އެއްލައްކަ ރުފިޔާއިން ޖޫރިމަނާކޮށްފި
މައްސަލަ ތަހުގީގުކޮށް ފިޔަވަޅު އަޅަން ފުލުހުންނަޑް ހުށަހަޅަންވެސް ނިންމި
އުމްރާއަށް ގެންދިޔަ ބަޔަކާމެދު އިހުމާލުވި އަލްހިޖުރަ ޓްރެވަލް އެންޑް ޓުއަރސް ޕްރައިވެޓް ލިމިޓެޑްގެ ހުއްދަ ބާޠިލްކޮށް, އެއްލައްކަ ރުފިޔާއިން ޖޫރިމަނާކޮށްފިއެވެ. އިސްލާމިކް މިނިސްޓްރީން މިއަދު އެކުންފުންޏާމެދު އެފިޔަވަޅު އެޅީ މިދިޔަ ޑިސެމްބަރު މަހު އުމްރާއަށް ގެންދިޔަ މީހުންގެ ތެރެއިން 23 މީހަކައަށް އެނބުރި އާދެވޭނެ ގޮތް ހަމަޖައްސައިދީފައި ނުވާތީއެވެ. އެމީހުން އަނބުރާ ގެނައުމުގެ ކަންކަން މިހާރު ކުރަމުންދަނީ އިސްލާމިކް މިނިސްޓްރީގެ މަޝްވަރާގެ މަތީން ހައްޖު ކޯޕަރޭޝަނުންނެވެ.
އެކުންފުންޏާމެދު ފިޔަވަޅު އައްޅުއްވާނެކަން އިއްޔެ އިސްލާމިކް މިނިސްޓަރ ޑރ.މުޙައްމަދު ޝަހީމް އަލީ ސައީދު އިއުލާނުކުރެއްވިއެވެ. އެކުންފުންޏާމެދު ފިޔަވަޅު އެޅުއްވިކަން ބަޔާންކޮށް މިއަދު ޢާއްމުކުރި ބަޔާނުގައި ބުނެފައިވަނި އެކުންފުނިން އުމްރާއަށް މީހުން ގެންދިއުމުގެ ހުއްދަ ހިފެހެއްޓުމާއެކު, އެއްލައްކަ ރުފިޔާއިން ޖޫރިމަނާކޮށްފައިވާ ކަމަށެވެ. އަދި އެކުންފުންޏާއި, އެކުންފުނީގެ އެއްވެސް ހިއްސާދާރެއް ހިމެނޭ އެހެން ކުންފުންޏަކަށްވެސް އުމްރާއަށް މީހުން ގެންދިއުމުގެ ހުއްދަ ނުދޭންވެސް ވަނީ ނިންމަވާފައެވެ. މީގެއިތުރުން އެމީހުން އުމްރާއަށް ގެންގޮސް އަނބުރާ ނެގެނައުމުގެ ސަބަބުން އިސްލާމިކް މިނިސްޓްރީން އަނބުރާ ގެންނަ އުމްރާވެރީން ގެނައުމުށްދާ ޚަރަދު އެކުންފުނިން ހޯދަންވެސް ވަނީ ނިންމަވާފައެވެ.
މީގެއިތުރުން އުމްރާއަށް މީހުން ގެންދިއުއުމުގެ އުޞޫލާ ހުލާފްވެފައިވާތީ އެމައްސަލަ ތަހުޤީޤުކޮށް, ޤާނޫނީ ފިޔަވަޅު އަޅަން ދިވެހި ފުލުހުންގެ ޚިދުމަތަށް ހުށަހަޅަންވެސް އިސްލާމިކް މިނިސްޓްރީން ވަނީ ނިންމަވާފައެވެ.
އަނބުރާ ރާއްޖެ ނުގެނެވި ތިބި އުމްރާވެރީންނަކީ ދައްކަންޖެހޭ ފައިސާ ހަމައަށް ދައްކާފައިވާ އުމްރާވެރީންނެވެ. ނަމަވެސް އެމީހުން އެނބުރި އަންނަ ޓިކެޓް ނުނަގާ އެފައިސާ އެހެން ކަންކަމަސް ބޭނުންކޮށްފައިވާ ކަމަށް ކުންފުނިން އެއްބަސްވެފައިވާ ކަމަށް އިސްލާމިކް މިނިސްޓްރީން ނެރުނު ބަޔާނުގައި ބުނެފައިވެއެވެ.
ރިއެކްޝަންސް
