ހަމަލާތައް ހުއްޓާލުމާބެހޭ ވާހަކަތައް ކުރިއަށް ދަނިކޮށް 50 މީހުން ޝަހީދުކޮށްލައިފި
ޣައްޒާގެ 3 ހޮސްޕިޓަލަކުން ތެޔޮ ހުސްވެ ޙިދުމަތް ހުއްޓެނީ
ހަމަލާތައް ހުއްޓާލުމާވެހޭ މަޝްވަރާތައް ފެށިފަހުންވެސް 50 މީހަކު ޣައްޒާގައި އިޒްރާއިލްއިން ޝަހީދުކޮށްލައިފިކަނަށް ރިޕޯޓްތައް ބުނެފިއެވެ. ބައިނަލްއަޤުވާމީ މެދުވެރިންނާއި އެކު ޤަތަރުގެ ވެރިރަށް ދޯހާގައި ކުރިއަށްދާ މަޝްވަރާތަކުގައި އަސީރުން ބަދަލުކުރުމަށް އެބަސްވުންތަކަށް އާދެވޭނެކަމަށް ބެލެވެއެވެ. ނަމަވެސް އިޒްރާއިލްގެ ޙައްދުފަހަނަ އެޅި އަމަލު ތަކާއެކު ޣައްޒާގެ އިތުރު ތިން ހޮސްޕިޓަލަކުން ތެޔޮ ހުސްވެ ބަލިމީހުންގެ ފުރާނައަށް ނުރައްކާވެދާނެ ކަމުގެ ބިރުވެސް ވަނީ ހީވެފައެވެ.
ޣައްޒާގެ ހެލްތު މިނިސްޓްރީން މައުލޫމާތުދޭގޮތުގައި އިޒްރާއިލްގެ ހުއްޓުމެއް ނެތް ހަމަލާތަކާއެކު އުތުރުގެ ހުރިހާ ހޮސްޕިޓަލްތަކުގެ ޙިދުމަތްވަނީ ފާއިތުވި ހަފުތާއިން ފެށިގެން ހުއްޓިފައެވެ. ދެކުނު ޙާން ޔޫނުސް ގެ ނަސެރް ހޮސްޕިޓަލް އާއި މެދުތެރޭ ދިއެރް އެލް-ބަލަޙްގެ އަލް-އަޤްސާ ހޮސްޓަލްއަށް ބުރާސްފަތި ދުވަހު 5 ޖެހުމާހަމައަށް ތެޔޮ ނުލިބިއްޖެ ނަމަ އޮޕަރޭޝަންތައް ހުއްޓޭނެ ކަމުގައި ވެސް ވަނީ މަޢުލޫމާތު ދިފައެވެ. މިހޮސްޕިޓަލް ތަކުގައި މިހާރުވެސް އެންމެ އާދައިގެ ބޭހާއި އެހެނިހެން ސާމާނުވެސް ވަނީ އެއްކޮށް ހުސްވެފައެވެ.
ޣައްޒާގެ ސިއްހީ އިދާރާގެ މަސްދަރުތަކުން ޝަހިދުވި މީހުންގެ އަދަދު އަލްޖަޒީރާއަށް ވަނީ ކަށަވަރުކޮށްދީފައެވެ. އިޒްރާއިލްއިން ޣައްޒާގެ އެކި ސަރަޙައްދުތަކުގައި ހިންގަމުން ގެންދާ އުދުވާނުތަކުގައި ހިފާފައިވާ ހުޅަނގު އައްސޭރިންވެސް ތިން މީހަކު ވަނީ ޝަހީދުކޮށްލާފައެވެ.
ދިއެރް އެލް-ބަލަޙް އިން ރިޕޯޓްކުރި އަލްޖަޒީރާ ގެ ނޫސްވެރިޔާ ތާރެޤް އަބޫ-އަޒޫމް ބުނެފައިވާ ގޮތުގައި ބުދަ ދުވަހު އިޒްރާއިލްގެ ހަމަލާތައް އެންމެ ބޮޑަށް ދީފައިވަނީ ޣައްޒާގެ އުތުރުގެ ހިސާބުތަކުގައެވެ. ޙާއްސަކޮށް ޣައްޒާ ސިޓީގައެވެ.
އޭގެތެރޭގައި ޣައްޒާ ސިޓީގެ ޕާކެއްގައި ފަސް މީހަކު ޝަހީދުކޮށްލާފައި ވާއިރު, ޖަބާލިއާ ގައި މީހުން ހިމާޔަތް ހޯދައިގެން ތިބި ސްކޫލަކަށް ހަމަލާދީ އިތުރު ހަތަރު މީހަކު ޝަހީދުކޮށްލާފައި ވެއެވެ. މެދުތެރޭ ޣައްޒާއަށް ދިން ހަމަލާއެއްގައި ބުރެއިޖް ރެފިއުޖީ ކޭމްޕްގައި ތިބި އެއް އާއިލާއެއްގެ 10 މީހުންވެސް ވަނީ ޝަހީދުކޮށްލާފައެވެ.
"މިއަދުވެސް ހެނދުނު, ހެނދުނާ ވައިގެ ހަމަލާތައް ފަށައިފި. ޣައްޒާ ސިޓީގައި އިންޓަނެޓް ލައިންތައް ވަޅުލަން ތިބި ހަތަރު މުވައްޒަފުންނަށް ހަމަލާދީ އެމީހުން ޒަޙަމްކޮށްލައިފި" އަބޫ-އަޒޫމް އަލް ޖަޒީރާއަށް ބުނެފައި ވެއެވެ.
އިޒްރާއިލްއިން ޣައްޒާއަށް ހަމަލާދޭތާ 15 މަސްދުވަސް ވެފައި ވާއިރު ހަމަލާތަކުގައި މިހާތަނަށް 45,936 މީހުން ޝަހީދުވެފައިވާކަމަށް ޢައްޒާގެ ހެލްތު މިނިސްޓްރީން މަޢުލޫމާތު ދެއެވެ. 109,274 މީހަކު ޒަޙަމްވެފައިވާއިރު މުޅި ޣައްޒާގެ އާބާދީގެ 2.4 މިލިއަން މީހުން ވަނީ އެތައް ފަހަރެއްގެ މަތިން ވިއްސި ވިހާލިވެފައެވެ.
ރިއެކްޝަންސް
