އިޒްރާއިލްގެ ހަމަލާއެއްގައި ހޫތީންގެ ބޮޑުވަޒީރު އަވަހާރަވެފައިވާކަން އެ ޖަމާއަތުން ކަށަވަރުކޮށްދީފި
ޔަމަނުގެ ސަނާއަށް މި ހަފުތާގައި ދިން ހަމަލާތަކުގައި ހޫތީންގެ އިތުރު ވަޒީރުންތަކެއްވެސް ވަނީ އަވަހާރަވެފައި
މި ހަފުތާގެ ކުރީކޮޅު ޔަމަންގެ ވެރިރަށް ސަނާއަށް އިޒްރާއިލްއިން ދިން ހަމަލާތަކުގައި ހޫތީންގެ ބޮޑުވަޒީރު އަޙްމަދު އަލް-ރަހާވީގެ އިތުރުން ބައެއް އެހެން ވަޒީރުން އަވަހާރަވެފައިވާކަން ޔަމަނުގެ މުޖާހިދުންގެ ޖަމާއަތުން ކަށަވަރުކޮށްދީފިއެވެ.
"ބޮޑު ވަޒީރު އަޙްމަދު އަލް-ރަވާހީ އާއި ބައެއް އެހެން ވަޒީރުން ބުރާސްފަތި ދުވަހު ވަނީ އަވަހާރަވެފައި" މިއަދު ހޫތީން ނެރުނު ބަޔާނުގައި ބުނެފައި ވެއެވެ. ނަމަވެސް އަވަހާރަވިކަމަށް ބުނާ މިނިސްޓަރުންގެ މައުލޫމާތު އެޖަމާއަތުން ހާމަކޮށްފައެއް ނުވެއެވެ.
ބައިބައިވެފައިވާ ޔަމަނުގައި ހޫތީންގެ ބާރުގެ ދަށުގައިވާ ސަރަހައްދުތަކުގެ ބޮޑުވަޒީރު އަދި ބައެއް މިނިސްޓަރުން އަވަހާރަކޮށްލާފައިވަނީ އެފަރާތްތަކުން ބައިވެރިވި ވޯކްޝޮޕެއް ކުރިއަށްދިޔަ ތަނަކަށް އަމާޒުކޮށް އިޒްރާއިލްއިން ދިން ހަމަލާ ތަކުގައެވެ.
ވެރިރަށް ސަނާއަކީ އިޒްރާއިލްގެ ހަމަލާތައް އަމާޒުވާ މައި ސަރަހައްދެވެ. އިޒްރާއިލްއިން ޣައްޒާގައި ޤަތުލްއާންމު ފެށިފަހުން ހޫތީން އިޒްރާއިލް އާ ދެކޮޅަށް ދޭންފެށި ހަމަލާތަކާއެކު އިޒްރާއިލްއިންވެސް ދަނީ ދޭތެރެ ދޭތެރެއިން ސަނާއަށް ވަރުގަދަ ހަމަލާތައް ދެމުންނެވެ.
އިޒްރާއިލްގެ އަސްކަރިއްޔާއިން ކުރިންވެސްވަނީބުރާސްފަތި ދުވަހު ހޫތީންގެ ސަރުކާރުގެ އަސްކަރީ މުހިއްމު ތަނަކަށް އަމާޒުކޮށް ހަމަލާދީފައިވާކަމަށް ބުނެފައެވެ.
ރިއެކްޝަންސް
