ފަހު ވަގުތު މެންޗެސްޓަރ ޔުނައިޓަޑް ސަލާމަތްކޮށްދިނީ ބްރޫނޯ ފެނާންޑޭޒްގެ ޕެނަލްޓީ
މިއީ ސީޒަންގައި ޔުނައިޓަޑްގެ ފުރަތަމަ މޮޅު
އިނގިރޭސި ޕްރިމިއަރ ލީގުގައި މިއަދު މެންޗެސްޓަރ ޔުނައިޓަޑް އާއި ބާންލީ ބައްދަލުކުރި މެޗު 97 ވަނަ މިނިޓްގައި ބްރޫނޯ ފެނާންޑޭޒް ކާމިޔާބުކޮށްދިން ޕެނަލްޓީއާއެކު 3-2 ން ޔުނައިޓަޑް ހަނިގޮތަކަށް މޮޅުވެއްޖެއެވެ.
ބުދަ ދުވަހު ކަރަބޯކަޕް ފައިނަލްގައި ބަލިވި މެންޗެސްޓަރ ޔުނައިޓަޑް ލަދުން އަރައިގަތުމަށް މިއަދުގެ މެޗަކީ ކޯޗު ރުބެން އަމޮރިމް އަދި މުޅި ޓީމަށްވެސް މުހިއްމު މެޗެކެވެ. މިއީ ބައިނަލްއަޤުވާމީ ބްރޭކަށް ދިއުމުގެކުރިން ސިޒަނުގައި ޔުނައިޓަޑްގެ ފުރަތަމަ މޮޅުވެސް މެއެވެ.
ފުރަތަމަ ހާފުގައި ގިނަ ވަގުތު ބޯޅަ ހިފަހައްޓައިގެން ކުޅުނު ޔުނައިޓަޑްއަށް މެޗުގެ 20 ވަނަ މިނިޓްގައިވެސް ޕެނަލްޓީއެއް ލިބުނެވެ. ނަމަވެސް ވީޑިއޯ އެސިސްޓަންޓް ރެފްރީ ވަނީ ފަހުން އެ ޕެނަލްޓީ ނިންމުން އަނބުރާ ގެންގޮސްފައެވެ. ޔުނައިޓަޑްގެ ފުރަތަމަ ގޯލަކީ 27 ވަނަ މިނިޓްގައި ބާންލީގެ ކެޕްޓަން ހޯޝް ކުލެން އަތުން ބައިކޮޅަށް ވައިން ގޯލެކެވެ.
ދެވަނަ ހާފު ފެށިގެން 10 ވަނަ މިނިޓްގައި ބާންލީއަށް ނަތީޖާ އެއްވަރުކޮށްދިނީ ލައިލް ފޮސްޓަރ އެވެ. އޭގެ ދެ މިިނެޓްފަހުން ޔުނައިޓަޑްގެ ޑިއޮގޯ ޑަލޮޓް ތަނަވަސްކޮށްދިން ފުރުޞަތުގެ ބޭނުންހިފާ ބްރަޔަން އެމްބުއޭމޯ ވަނީ ޔުނައިޓަށް ކޮޅަށް އަނެއްކާވެސް ނަތީޖާ އަނބުރާލާފައެވެ.
ބާންލީން ދެވަނަ ފަހަރަށް ނަތީޖާ އެއްވަރުކުރީ 66 ވަނަ މިނިޓްގައި ޖެއިޑަން އެންތޮނީ ކާމިޔާބުކޮށްދިން ގޯލާއެކުއެވެ.
ޔުނައިޓަޑްގެ ނަސީބު އަތުގައި ހިފީ މެޗުގެ ފުރިހަމަވަގުތު ނިމި އިތުރުވަގުތުގެ ހަތްވަނަ މިނިޓްގައި ޔުނައިޓަޑްގެ އަމަޑް ޑައަލޯއަށް ބާންލީގެ އެންތަނީ ކުރި ފައުލަކާ ގުޅިގެން ޕެނަލްޓީއެއް ލިބުމާއެކުއެވެ.
މިއަދު ކުޅުނު އިތުރު މެޗުތަކަށް ބަލާއިރު ބްރެންޓްފޯޑް އަތުން ސަންޑަލޭންޑް މޮޅުވީ 2-1 ންނެވެ. ބޯންމައުތު އަތުން 1-0 ން ޓޮޓްނަމް ހޮޓްސްޕަރ ބަލިވެފައިވާއިރު, ވުލްވުސްގެ މައްޗަށް އެވަރޓަން ކުރިހޯދީ 3-2 ންނެވެ.
ރިއެކްޝަންސް
