
އަލެހަންޑްރޯ ގާނަޗޯ 54 މިލިއަން ޑޮލަރަށް ޗެލްސީއަށް
ގާނަޗޯ މިއަދު ވަނީ ޗެލްސީ އާއި ބާންލީ ބައްދަލުކުރި މެޗު ބަލަން ދަނޑަށް ގޮސްފައި
މެންޗެސްޓަރ ޔުނައިޓަޑްއިން 40 މިލިއަން ޕައުންޑަށް (54 މިލިއަން ޑޮލަރު) ޗެލްސީއަށް އަލެހަންޑްރޯ ގާނަޗޯ ވިއްކާލައިފިއެވެ. ގާނަޗޯ ޗެލްސީއާ ގުޅުނުކަން އެކްލަބުންވެސް ވަނީ ކަށަވަރުކޮށްދީފައެވެ.
21 އަހަރުގެ ކުޅުންތެރިޔާ މެންޗެސްޓަރ ޔުނައިޓަޑްގެ ކޯޗު ރުބެން އަމޮރިމްގެ ޕްލޭނުން ދޫކޮށްލާފައިވާތާ އެތައް ދުވަހެއް ފަހުން ޗެލްސީއަށް ބަދަލުވެފައިވަނީ 2032 ގެ ނިޔަލަށް ކަމަށް ޗެލްސީން ވަނީ ބުނެފައެވެ.
ގާނަޗޯ ޗެލްސީއާ ގުޅުނުކަން ރަސްމީކޮށް އިއުލާން ކުރުމުގެ ކުރިން މިއަދު ޕްރިމިއަރ ލީގުގައި ބާންލީ އަތުން 3-2 ން ޗެލްސީ މޮޅުވިއިރު ޗެލްސީގެ ސްޓޭންޑްތަކުގައި މެޗުބަލަން ގާނަޗޯއިން މަންޒަރު ގިނަ ބައެއްގެ ލޮލުގައި ވަނީ އަޅައިގެންފައެވެ.
"ޗެލްސީ އާ ގުޅުމަކީ އަހަރެން އަދި އާއިލާއަށްވެސް ވަރަށް އުފާވެރި ވަގުތުކޮޅެއް. ޗެލްސީއާއެކު ކުޅެން އަހަރެން މިހުރީ ކެތްމަދުވެފައި. އަަހަރެން ކްލަބް ވޯލްޑްކަޕް ބެލިން. ދުނިޔޭގެ ޗެމްޕިއަން ޓީމާ ގުޅުމަކީ ހާއްސަކަމެއް. ޗެލްސީއާ ގުޅެވުމުން އަހަރެން މި ހުރީ ވަރަށް އުފަލުން" އީއެސްޕިއެންއަށް ގާނަޗީ ބުނެފައި ވެއެވެ.
ޔުނައިޓަޑްގައި މުހިއްމު ދައުރެއް އަދާކުރަމުން އައި ގާނަޗޯއަށް މެއި މަހު އޮތް ޔުރޮޕާ ލީގުގެ ފައިނަލަށް ފަހު އަމޮރިމްގެ ސްކޮޑުން ޖާގަ ނުލިބި ހޭދަކުރީ ބެންޗުގައެވެ. އަދި ކުރިމަގާ ބެހޭގޮތުން ގޮތެއް ނިމެންދެން ފަރިތަކުރިންތައްވެސް ކުރިއަށް ގެންދިޔައީ މައި ޓީމާ ވަކިން ކެރިންގްޓަންގައެވެ.
އާޖެންޓީނާއަށް އުފަން ގާނަޗޯ ޕްރިމިއަރ ލީގަށް ކުޅެދިން 93 މެޗުގައި 16 ގޯލް ވަނީ ކާމިޔާބުކޮށްދީފައެވެ.
ރިއެކްޝަންސް






