"ރޯދައިގެ ކުރިން ފްލެޓް ލިސްޓް އިއުލާނުކުރެވޭނެ ކަމަށް ގަބޫލުކުރެވޭ"- ރައީސް
މައިގަނޑު އަމާޒަކީ އެމީހަކަށް ފްލެޓް ލިބުނު ތާކުން ނޫނިއްޔާ ގޯތި ލިބުނު ތާކުން ދިނުން
ރޯދައިގެ ކުރިން ފްލެޓް ލިސްޓް އިއުލާނުކުރެވޭނެ ކަމަށް ގަބޫލުކުރެއްވޭ ކަމަށް ރައީސުލްޖުމްހޫރިއްޔާ ޑރ.މުޙައްމަދު މުއިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ހުވަދުއަތޮޅަށް ކުރެއްވި ދަތުރުފުޅު ނިންމަވާލެއްވުމުގެ ކުރިން ނޫސްވެރިންނާ ބައްދަލުކުރައްވާ ނޫސްވެރިއަކު ސީދާ ފްލެޓްތަކާ ގުޅޭ ގޮތުން ސުލާވުކުރެއްވުމުންނެވެ.
ރޯދައިގެ ކުރިން ފްލެޓް ލިސްޓް އިއުލާނުކުރެވޭނެތޯ ނޫސްވެރިޔާ ސުވާލުކުރެއްވުމުން ރައީސް ޑރ.މުއިއްޒު ވިދާޅުވީ " އަޅުގަނޑަށް ވަރަށްބޮޑަށް ގަބޫލުކުރެވޭ ކުރެވޭނެ ކަމަށް." ށެވެ. ރައީސުލްޖުމްހޫރިއްޔާ ވިދާޅުވީ ވީހާވެސް އަވަހަކަށް ހަތަރުހާސް ފްލެޓްގެ ކަންތައް އިއުލާނުކުރެވޭނެކަމަށް އުއްމީދުކުރައްވާ ކަމަށެވެ.
މިދިޔަ ސަރުކާރުން ހުޅުމާލޭގައި އަޅަން ފަށާ އެކިމަރުހަލާގައި ހުރި 4000 ފްލެޓް ލިބޭ މީހުންގެ ލިސްޓް އިއުލާނުކުރަން ތަފާތު ތާރީޚުތައް ދެއްވި ނަމަވެސް މިއަދާ ހަމައަށް އެލިސްޓް އިއުލާނުކުރެވިފައެއް ނުވެއެވެ. ލިސްޓް އިއުލާނު ނުކުރެވި ހައުސިންގ މިނިސްޓްރީ އުވާލައްވާ ގެދޮރުވެރިކަމާ ބެހޭ ވުޒާރާގެ މަސައްކަތްތައް (ފްލެޓްތައް ހިމެނޭހެން) ވަނީ ކޮންސްޓްރަކްޝަން މިނިސްޓަރ ޑރ.އަބްދުالله މުއްޠަލިބުގެ ބެއްލެވުމުގެ ދަށަށް ބަދަލުކުރައްވާފައެވެ. ހައުސިންގެ މަސައްކަތްތައް ވަނީ އެވުޒާރާއާ އެއްކޮށްލައްވާފައެވެ.
ރައީސުލްޖުމްހޫރިއްޔާ ވިދާޅުވީ މިދިޔަ އަހަރެއްހާ ދުވަހުގެ ތެރޭގައިވެސް ފްލެޓް ލިސްޓް ރިވިއުކޮށް, ވައުދުވެވަޑައިގެންނެވި ގޮތަށް ވީހާވެސް އަވަހަށް ދިނުމުގެ މަސައްކަތް ފައްޓަވާފައިވާ ކަމަށެވެ.
" އަޅުގަނޑު ވައުދުވީ އެއްވެސް ރައްޔިތަކަށް އެއްވެއސް ރައްޔިތަކަށް ދީފައިވާ ގޯއްޗެއް ފްލެޓެއް އަޅުގަނޑުމެންނެއް އަތެއް ނުލާނަމޭ. ދެން އަބަދުވެސް އޮންނަ ހަމައެކޭ ނުގަވާއިދުން މަކަރުހަދައިގެން ދޮގުހަދައިގެން ފޯޖް ޑޮކިއުމަންޓް ލައިގެން މިކަހަލަ ގޮތަކަށް މީހަކު ގޯއްޗެއް ފްލެޓެއް ހޯދާފަ އޮވެއްޖިއްޔާ އެއީހަމަ އެމީހަކު އަތުން ކެންސަލްވާނެ އެއްޗެއް. އެއީ އިސްތިސްނާއެއް, އެކަހަލަ ކަންތައްތަކެއް ހިނގާފަހުރިއްޔާ ނޫނިއްޔާމް, އޭސީސީން އެބެލި ބެލުންތަކުގެ ތެރެއިން ގޯސްކޮށް ކަމެއްކޮށްފަހުރި ބަޔަކު ފިޔަވާ އެންމެންނަށް ހަމަ އަޅުގަނޑު ވައުދުވީ ގޮތަށް ދޭން ބޭނުންވަނީ." ރައީސް ވިދާޅުވިއެވެ.
ރައީސް މުއިއްޒު ވިދާޅުވީ ކުރިއަށްއޮތް ދުވަސްތަކުގައި ވަރަށްބާރު ސްޕީޑްގައި އެވައުދުވީގޮތަށް އެކަން ކުރުމުގެ މަސައްކަތްތަކެއް މިހާރު އެއޮތީ ފަށާފައި ކަމަށެވެ. މައިގަނޑު އަމާޒަކީ އެމީހަކަށް ފްލެޓް ލިބުނު ތާކުން ނޫނިއްޔާ ގޯތި ލިބުނު ތާކުން ދިނުން ކަމަށް ވިދާޅުވިއެވެ. އެހެންނަމަވެސް ގޯސްތަކެއް ހަދާފަ އޮތް ބައެއްގެ ކަންތައް ބެލޭނެ ކަމަށް ވިދާޅުވިއެވެ.
ރިއެކްޝަންސް
