އަތުން ފައިސާ ދައްކަން ޖެހޭ ހާލަތްތަކުގައި މިހާރެކޭ އެއްގޮތަށް އާސަންދަ ލިބޭނެ- އެންސްޕާ
އަތުން ފައިސާ ދައްކަން ޖެހޭ ހާލަތްތަކުގައި މިހާރެކޭ އެއްގޮތަށް އާސަންދަ ލިބޭނެ ކަމަށް ނެޝަނަލް ހެލްތް ޕްރޮޓެކްޝަން އެޖެންސީ (އެންސްޕާ) އިން ބުނެފިއެވެ.
މިކަން ފާހަގަކޮށް އާސަންދައިން ބަޔާނެއް ޢާއްމުކޮށްފައި މިވަނީ އާސަންދަ ޚިދުމަތަށް ގެނައި ބަދަލުތަކާއެކު އަތުން ދައްކަން ޖެހޭ ފައިސާގެ އަދަދު ބޮޑު ކަމުގެ ޝަކުވާތައް ޢާއްމުން ކުރަމުން ދަނިކޮށެވެ. ޕްރައިވެޓް އާސަންދައިގެ ބޭނުން ދައްކަން ޖެހޭ ފައިސާ އަމިއްލަ އަތުން ދައްކަން ޖެހޭ ކަމަށް ބައެއް ފަރާތްތަކުން ސޯޝަލް މީޑިޔާގައި ވެސް ހިއްސާކުރަމުން ދަނިކޮށް, އެންސްޕާއިން ބުނީ އެއްވެސް ފަރާތަކަށް ޕްރައިވެޓް އިންޝުއަރެންސްގެ ކަވަރޭޖް ނުވަތަ ޚިދުމަތް ނުލިބޭ ހާލަތެއްގައި ނަމަ އެފަރާތަކަށް އާސަންދަ ސްކީމުން މިހާރުވެސް ޚިދުމަތް ލިބެމުންދާ ގޮތަށް ބޭސްފަރުވާގެ ޚިދުމަތް ލިބެމުންދާނެ ކަމަށެވެ.
އަމިއްލަ އިންޝުއަރެންސް ކުންފުނިތަކުން ކޭޝްލެސް ޕޭމަންޓް ހުއްޓާލުމުގެ ސަބަބުން ވިޔަސް, އަމިއްލަ އިންޝުއަރެންސް ޕޮލިސީން ކަވަރޭޖް ނުލިބި, އަމިއްލަ ޖީބުން ފައިސާ ދައްކަންޖެހޭ ހުރިހާ ހާލަތެއްގައި އާސަންދަ ކަވަރޭޖް ކުރިއެކޭވެސް އެއްގޮތަށް ލިބޭނެ ކަމަށް އެންސްޕާގެ ބަޔާނުގައި ބުނެފައި ވެއެވެ.
އެންސްޕާއިން ވަނީ ހަގީގަތް އޮޅޭގޮތަށް އެކިފަރާތްތަކުން ދޮގު މައުލޫމާތު ފަތުރަމުންދާކަމަށް ބުނެ, އެކަމާ ކަންބޮޑުވުން ފާޅުކޮށްފައެވެ. ޞައްހަ މައުލޫމަތު ފާސްކުރުމަށް އެންސްޕާއިން ވަނީ އިލްތިމާސްކޮށްފައެވެ. އެންސްޕާގެ ނަމްބަރު 1400 އަށް ގުޅުމުން މައުލޫމާތު ސާފްވާނެ ކަމަށް އެންސްޕާއިން ބުންޏެވެ.
ރިއެކްޝަންސް
