'ކޮރަޕްޝަންގެ މައްސަލަތައް ބަލާއިރު ކުށްކުރި މީހާއެއް ނުބަލާނެ, ބަލާނީ ކުރިކުށް'
މިސަރުކާރުން ރައީސް ޑރ.މުހައްމަދު މުއިއްޒު ބައްލަވާނީ ކުރި ކުށް ކަމަށާއި, އެކުށްކުރި މީހާއަށް ނުބައްލަވާނެ ކަމަށް ރައްޔިތުންގެ މަޖިލިހުގެ ރައީސް އަބްދުއްރަހީމް އަބްދުالله ވިދާޅުވެއްޖެ އެވެ.
ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން އަބްދުއްރަހީމް ވިދާޅުވީ ރައީސް ޑރ.މުހައްމަދު މުއިއްޒުގެ އަމާޒަކީ އެކަން ކުރީ ކާކުތޯ ބެލުމެއް ނޫން ކަމަށާއި, އެކުރީ ކޮންކަމެއްތޯ ބެލުން ކަމަށެވެ. ރައީސް މުއިއްޒު ބައްލަވާނީ އެކަން ކުރީ ހަމައިންތޯ, ނަހަމައިންތޯ ނުވަތަ ޤާނޫނާ އެއްގޮތަށްތޯ ނުވަތަ ޤާނޫނާ ހިލާފަށްތޯ ކަމަށް އަބްދުއްރަހީމް ވިދާޅުވިއެވެ. މީގެއިތުރުން މާލިއްޔަތު ޤާނޫނު އެކަން ކުރަން ތަންދޭތޯ ނުދޭތޯ އާއި އޭގެސަބަބުން ދައުލަތަށް ވަނީ ކިހާވަރެއްގެ ގެއްލުމެއްތޯ މިސަރުކާރުން ބައްލަވާނެކަމަށް ވިދާޅުވިއެވެ. އެގެއްލުން ވީ ކާކުގެ ސަބަބުންތޯ ބަލަނީ އޭގެ ފަހުން ކަމަށް އަބްދުއްރަހީމް ވިދާޅުވިއެވެ,
" ފުރަތަމަ ބަލަނީ ކަން ހިނގާފަ އޮތްގޮތެއް, ކަންހިނގާފަ އޮތްގޮތެއް ބެލީމަ މިއެނގެނީ އެއީ ކާކުކަން, ދެން އެދާއިރު އެއީ ކާކުކަމަށް ވިޔަސް, ކޮންމެ މީހަކު ކަމަށްވިޔަސް ޖެހޭނީ އެމީހަކަށް އެޤާނޫނީ ގޮތުން ކުރަންޖެހޭ ތަހުގީގަކަށް ހާޒިރުކޮށް ތަހުގީގު ކުރަން. ކުށްވެރިވާ މީހާ އިނގޭނީ އިޖުރާއަތްތަކުގެ ތެރެއިން. އަޅުގަނޑުމެން ނުބަލަން ކުށްވެރިވާ މީހާއެއް." އަބްދުއްރަހީމް ވިދާޅުވިއެވެ.
އަބްދުއްރަހީމް ވިދާޅުވީ މީގެކުރިން ކޮރަޕްޝަން ހުއްޓުވަން އެއްވެސް ސަރުކާރަކުން މަސައްކަތް ނުކުރާ ވަރަށް މިސަރުކާރުން މަސައްކަތް ކުރައްވާނެ ކަމަށް ވިދާޅުވިއެވެ. އެކަމަށް ވަރަށްބޮޑަށް އިސްކަން ދެއްވާނެ ކަމަށާއި, ދައުލަތުން ގެއްލިފައިވާ ފައިސާތައް ހޯދުމަކީ ރައީސް ޑރ.މުއުއްޒުވެ ވަރަށް ވަރުގަދަ ވައުދެއްކއްރަހީމް ފާހަގަކުރެއްވިއެވެ. އަބްދުއްރަހީމް ވިދާޅުވީ ގައުމަށް, ދައުލަތަށް ހިޔާނާތްތެރިވީމަ އެމައްސަލަ ބަލަންޖެހޭނެ ކަމަށެވެ. އެއީ ކޮންމެ މީހެއް ކަމަށް ވިޔަސް އެކަން ބަލަން ޖެހޭނެ ކަމަށް ވިދާޅުވިއެވެ.
" އެއީ ކުރީ ސަރުކާރުގެ ވަޒީރެއްތޯ ނުވަތަ ކުރީ ސަރުކާރުގެ އެމްޑިއެއްތޯ އެއީ ކުރީގެ ރައީސެއްތޯ, ނައިބު ރައީސެއްތޯ ބަލާކަށް ނުޖެހޭނެ. ކަންކުރި މީހާއަކަށް ނޫން ބަލަންވީ, ކުރިކަމަށް ބަލަންވީ. " އަބްދުއްރަހީމް ވިދާޅުވިއެވެ.
އަބްދުއްރަހީމް ވިދާޅުވީ އަޅުގަނޑުމެންނަށް ވަރަށްގިނަ ފަހަރު ވާގޮތަކީ ކަންކުރި މީހާއަށް ބަލައިގެން ކަންކަން ބަލަން އުޅުން ކަމަށެވެ. އެހެން އުޅެން ހަދައިގެން އެފައިސާތައް ނުހޯދި ދަނީ ކަމަށް ވިދާޅުވިއެވެ.
ރިއެކްޝަންސް
