ރާއްޖެ ކައިރިއަށް 4.7 މެގްނިޓިއުޑްގެ ބިންހެލުމެއް! ނުރައްކަލެއް ނެތް!
ދިވެހިރާއްޖެއާ 912 ދުރުން ކަނޑުއަޑިއަށް ބިންހެލުމެއް އައިސްފިއެވެ. ބިންހެލުމުގެ ބާރުމިން ރެކްޓަރ މިންގަނޑުން 4.7 މެގްނިޓިއުޑް ގައި ހުރި ނަމަވެސް ބިންހެލުމުގެ ސަބަބުން ރާއްޖެއަށް އަސަރެއް ނުކުރާނެ ކަމަށާއި ނުރައްކަލެއް ނެތްކަމަށް މޫސުމާ ބެހޭ ޤައުމީ އިދާރާއިން ވަނީ ބުނެފައެވެ.
މިއީ ބާރުދަށް ބިންހެލުމަކަށްވާތީ ސުނާމީގެ އިންޒާރުވެސް ދީފައި ނުވާކަމަށް މެޓު އޮފީހުން ބުނެފައި ވެއެވެ. ބިންހެލުން އައިސްފައިވަނީ އިންޑިއާ ކަނޑުގައި އޮންނަ ކާލްބަރގް ރިޖް އަށެވެ. ބިންހެލުން އައި ކަމަށް މެޓް އޮފީހުން މައުލޫމާތު ދީފައިވަނީ މިއަދު މެންދުރުފަހު 13:38ގައެވެ. އެއީ ރާއްޖެއާ އެންމެ ކައިރީގައި އޮންނަ ޓެކްޓޯނިކް ޕްލޭޓްއެވެ.
ކާލްސްބަރގް ރިޖް އަކީ ދޭތެރެ ދޭތެރެއިން ބިންހެލުންތައް އަންނަ ޕްލޭޓް އެކެވެ. އެސަރަޙައްދަށް އެންމެ ފަހުން ބިންހެލުމެއް އައިސްފައިވަނީ 2013 ވަނަ އަހަރުގެ ޖުލައި މަހުއެވެ. އެފަހަރުގެ ބިންހެލުމުގެ ބާރުމިނުގައި 7.6 މެގްނިޓިއުޓް ހުއްޓެވެ. ނަމަވެސް އެފަހަރުވެސް ސުނާމީގެ އިންޒާރު ދީފައެއް ނުވެއެވެ. އަދި އެކަމުގެ ސަބަބުން އެއްވެސް ނުރައްކަލެއް ކުރިމަތުވެފައިވެސް ނުވެއެވެ.
ބިންހެލުންތައް އުފެދެނީ ގުދުރަތީ ގޮތުން އުފެދިފައިވާ ޓޭކްޓޯނިކް ޕްލޭޓްސްތައް އެއް ޕްލޭޓް އަނެއް ޕްލޭޓްއާ މުޑިއަރާ ހިނގާ ހަރަކާތްތަކުގެ ސަބަބުންނެވެ. އެކަމާ ގުޅިގެން އަންނަ ގުޑުންތަކަށް ބިންހެލުމޭ ކިޔައެވެ.
ރިއެކްޝަންސް
