ދިވެހިރާއްޖެ އާއި ޗައިނާގެ މިނިވަން ވިޔަފާރީގެ އެއްބަސްވުމަށް ޖެނުއަރީ ފުރަތަމަ ދުވަހު އަމަލުކުރަންފަށަނީ
މީގެ 10 އަހަރުކުރިން ޗައިނާއާއެކު ދިވެހިރާއްޖެއިން ސޮއިކުރި މިނިވަން ވިޔަފާރީގެ އެއްބަސްވުމަށް އަންނަ ބުދަ ދުވަހުން ފެށިގެން އަމަލުކުރުމަށް ނިންމައިފިއެވެ. މިކަން އިޢުލާންކުރީ އިކޮނޮމިކް މިނިސްޓަރ, މުޙައްމަދު ސަޢީދު ޗައިނާގެ ކޮމާސް މިނިސްޓަރު ވަންގް ވެންޓާއޯ އާއެކު އޮންލައިންކޮށް އެކަން އިޢުލާން ކުރުމަށް މިއަދު ބޭއްވެވި ރަސްމިއްޔާތެއްގައެވެ.
ބައްދަލުވުމުގައި މިނިސްޓަރު ވިދާޅުވީ މި އެއްބަސްވުމަށް އަމަލުކުރަންފެށުމާއި އެކު އެއްބަސްވުމުގެ ދަށުން ދިވެހި ދިވެހިރާއްޖޭގެ އިޤްތިޞާދަށް ހެޔޮ ބަދަލުތަކެއް އަންނާނެ ކަމުގައެވެ. އޭގެ ތެރޭގައި ދިވެހިރާއްޖެއިން ޗައިނާއަށް އެކްސްޕޯޓް ކުރާ މަހުން ޑިއުޓީ މާފުވާނެކަމަށާއި, ޗައިނާއިން ދިވެހިރާއްޖެ އަށް އެތެރެކުރާ އެހެނިހެން ބާވަތްތަކުގެ މުދާ އެތެރެކުރުމުގައި ފަސޭހަތަކެއް ލިބިގެންދާނެކަމުގައެވެ.
ދިވެހިރާއްޖެ ޗައިނާގެ މިނިވަން ވިޔަފާރީގެ އެއްބަސްވުމުގައި ސޮއިކުރީ 2014 ވަނަ އަހަރުގެ ޑިސެމްބަރު މަހު އޭރުގެ ރައީސް ޢަބްދުالله ޔާމީނު ޢަބްދުލް ޤައްޔޫމްގެ ވެރިކަމުގައެވެ. އެއްބަސްވުމަށް ރައްޔިތުންގެ މަޖިލީހުން ރުހުންދެއްވީ 2017 ވަނައަހަރު އެވެ. ނަމަވެސް އޭގެ ފަހުން ސަރުކާރު ބަދަލުވެ, އެއްބަސްވުމަށް އަމަލުކުރުން ވަނީ މަޑުޖައްސާލާފައެވެ.
2023 ގައި އަނެއްކާވެސް ސަރުކާރު ބަދަލުވެ ރައީސް މުޙައްމަދު މުއިއްޒު ޗައިނާއަށް ކުރެއްވި ރަސްމީ ދަތުރުފުޅުގައި އެއްބަސްވުމަށް އަލުން އަމަލުކުރުމާ ގުޅޭ މަޝްވަރާތައް އަލުންވަނީ ފަށާފައެވެ. ދަތުރުފުޅަށްފަހު އެނބުރި ވަޑައިގެން ރައީސް ވިދާޅުވެފައިވަނީ މި އެއްބަސްވުމަށް އަމަލުކުރަން ފެށުމާއި އެކު ދިވެހިރާއްޖެ އާއި ޗައިނާ އާ ދެމެދު ކުރެވޭ ވިޔަފާރީގެ މުއާމަލާތްތައް އެއްބިލިއަން ޑޮލަރަށް އިތުރުވެގެންދާނެކަމުގައެވެ.
އެއަބަސްވުމަށް އަމަލުކުރުން ނިންމުމަށް މިއަދު ބޭއްވެވި ރަސްމިއްޔާތުގައި މިނިސްޓަރު އިތުރަށް ވިދާޅުވީ ދެ ޤައުމުންވެސް މިހާރު ވަނީ މި އެއްބަސްވުމަށް އަމަލުކުރުމަށް ފުރިހަމައަށް ތައްޔާރުވެފައި ކަމުގައެވެ. އަދި އެއްބަސްވުމުގެ ދަށުން ޗައިނާއާއި ރާއްޖޭގެ ގުޅުން އިތުރު ހަރުފަތަކަށް ގެންދެވޭނެ ކަމަށް އުއްމީދުކުރައްވާ ކަމަށްވެސް މިނިސްޓަރު ވިދާޅުވިއެވެ.
"އަމިއްލަ ފަރުދުންނާއި ދިވެހި ވިޔަފާރިތަކަށް, ޖުމްލަ ގޮތެއްގައި ދިވެހި އިޤްތިޞާދަށް އެއްބަސްވުމުގެ ސަބަބުން ފައިދާކުރާނެ. އަމިއްލަ މަސައްކަތްކުރާ ފަރާތްތަކުގެ އުފެއްދުންތައް ޗައިނާގެ ބާޒާރަށް ނެރުމުގައި މި އެއްބަސްވުމުގެ ދަށުން ލުއިތަކެއް ލިބިގެންދާނެ. މީގެ ސަބަބުން ވަޒީފާތައް އިތުރުވެ, ފަރުދުން އަދި ދަޢުލަތުގެ އާމްދަނީއަށް ހެޔޮބަދަލެއް އަންނާނެ" މިނިސްޓަރު ސައީދު ވިދާޅުވިއެވެ.
ޗައިނާގެ ކޮމާސް މިނިސްޓަރުވެސް ވަނީ ޗައިނާއާއި ދިވެހިރާއްޖެ އާ ދެމެދު ޒަމާނުއްސުރެ އޮންނަ ގާތްގުޅުމާ ބެހޭގޮތުން ވާހަކަ ދައްކަވާފައެވެ. އެގޮތުން ފާއިތުވި އަހަރުތަކުގައި ދެޤައުމުގެ އިޤްތިޞާދީ ގުޅުން ވަރަށް ބޮޑަށް ބަދަހި ވެފައިވާ ކަމުގައި ވޮންގް ފާހަގަކުރައްވާފައި ވެއެވެ. އަދި މި އެއްބަސްވުމަށް އަމަލުކުރަން ފެށުމާއި އެކު މި ގުޅުން އިތުރަށް ހަރުދަނާވެ ކޮންސިއުމަރުންނަށް ހެޔޮއަގުގައި ގިނަ ބާވަތްތަކުގެ މުދާ އެތެރެކުރެވޭނެ މަގު ފަހިވެގެން ދާނެ ކަމަށްވެސް ވޮންގް ވިދާޅުވިއެވެ.
ރިއެކްޝަންސް
