ފެނަކައަށް އާ އެމްޑީ އެއް އައްޔަން ކުރައްވައިފި
ޕީއެސްއެމްގެ އެމްޑީ އަކަށް ނަސްރީން ވަނީ އައްޔަން ކުރައްވާފަ
ފެނަކައަށް އާ އެމްޑީއެއް މިއަދުން މިއަދަށް އައްޔަން ކުރައްވައިފިއެވެ. ފެނަކަ ކޯޕަރޭޝަން ލިމިޓެޑްގެ މެނޭޖިންގ ޑިރެކްޓަރ ކަމުގެ މަޤާމަށް އައްޔަން ކުރެއްވީ ހ.ޔެލޯރޯޒް 2، މޭޖަރ (ރިޓަޔަރޑް) މުޙައްމަދު ނަޖާޙް އެވެ. އޭނާ އަކީ 21 އަހަރު ސިފައިންގޭގައި ޚިދުމަތް ކުރެއްވި ބޭފުޅެކެވެ.
ފެނަކައަށް އާ މެނޭޖިންގ ޑިރެކްޓަރެއް އައްޔަންކުރެއްވީ މިސަރުކާރު ފެށުމާއެކު އެމަގާމަށް އައްޔަން ކުރެއްވި ރައްޔިތުންގެ މަޖިލިހުގެ ކުރީގެ މެމްބަރު މުޢާޒު މުޙައްމަދު ރަޝީދު މިއަދު އެމަގާމުން އިސްތިއުފާ ދެއްވުމާ ގުޅިގެންނެވެ. މުއާޒު އިސްތިއުފާދެއްވީ ކުންފުނީގެ ޚަރަދުތައް ކުޑަކުރަން އެކުލަވާލެއްވި ޕްލޭންތައް ތަންފީޒުކުރެއްވުމަށް ކަމާބެހޭ އިދާރާތަކުން އެއްބާރުލުން ނުދެއްވި ކަމަށް ވިދާޅުވެއެވެ. އަދި ކުންފުންޏަށް ލިބޭ އާމްދަނީއަށްވުރެ ޚަރަދު ބޮޑުވި ނަމަވެސް އެކަން ބަދަލުކުރުމަށް ކުރަންޖެހޭ މަސައްކަތްތަކަށް އެއްބާރުލުން ނުލިބޭ ކަމަށް ވިދާޅުވިއެވެ.
ފެނަކައަކީ މިސަރުކާރު ހަވާލުވި ފަހުން ފާޑުކިއުން އެންމެ ބޮޑު އެއް ކުންފުންޏެވެ. ޚާއްޞަކޮށް މުވައްޒަފުން އިތުރު ކުރުމާއި, ކަރަންޓް ބިލްތަކުގެ އަގު ބޮޑުވަމުން ދިޔަކަން ސޯޝަލް މީޑިޔާގައި ރައްޔިތުން ފާހަގަކުރިއެވެ.
ފެނަކައިގެ މެނޭޖިންގ ޑިރެކްޓަރުގެ ކުރިން އެޗްޑީސީގެ މެނޭޖިންގ ޑިރެކްޓަރ އިބްރާހީމް ފަޒުލް ރަޝީދު އާއި ޕީއެސްއެމްގެ މެނޭޖިންގ ޑިރެކްޓަރ މުޙައްމަދު ސައީދު ވެސް ވަނީ މިހަފްތާގައި އިސްތިއުފާ ދެއްވާފައެވެ.
އެޗްޑީސީގެ އާ މެނޭޖިންގ ޑިރެކްޓަރަކަށް އައްޔަން ކުރެއްވީ ކުރީގެ ވަޒީރު މައުރޫފް ޖަމީލެވެ. ޕީއެސްއެމްގެ މެނޭޖިންގ ޑިރެކްޓަރަކަށް އައްޔަންކުރެއްވީ ކުންފުނީގެ ޚިދުމަތުގައި ގިނަ އަހަރުތަކެއްވީ އިބްރާހީމް ނަސްރީން އެވެ.
ނަސްރީނު މިހާތަނަށް ހުންނެވީ އެކުންފުނީގެ ސޭލްސް އެންޑް މާކެޓިންގ ޑިރެކްޓަރުގެ މަގާމްގައެވެ. ޕީއެސްއެމްގެ ޗެއަރޕަސަން އަކަށް ޕްރެޒެންޓަރ އާމިނަތު ނަމްޒާ ވެސް ވަނީ އައްޔަން ކުރައްވާފައެވެ.
ރިއެކްޝަންސް
