ބިންވެރިޔާ ސްކީމްގެ ތަހުގީގަށްވެސް ޢާއްމުންގެ އެހީ ހޯދަނީ
މައުލޫމާތު ހިއްސާކުރަންޕޯޓަލްއެއް ވަނީ ކަނޑައަޅާފަ
އުސޫލާ ހިލާފަށް ބިންތަކެއް ދޫކުރި މައްސަލަ ފެމްނަތިވެ ފެށި ތަހުގީގަށްވެސް ޢާއްމުންގެ އެހީއަށް ފުލުހުން އެދިއްޖެއެވެ. ފުލުހުން ޢާއްމުންގެ އެހީއަށް އެދުނީ އެޚިދުމަތުން ތަހުގީގުކުރާ ބިންވެރިޔާ އަދި ގެދޮރުވެރިޔާ ސްކީމްގެ ތަހުގީގަށެވެ.
ފުލުހުން ވަނީ އެތަހުގީގަށް ބޭނުންކުރެވިދާނެ ކަމަށް ބެލެވޭ އެއްވެސް މައުލޫމާތެއް ލިބިފައިވާނަމަ ހިއްސާކުރުމަށް އެދިފައެވެ. މައުލޫމާތު ހިއްސާކުރުމަށް ފުލުހުން ވަނީ ޚާއްޞަ ޕޯޓަލްއެއް ތައްޔާރުކޮށްފައެވެ. މައުލޫމާތު ހިއްސާ ކުރާ ޕޯޓަލްއަކީ https://evidence.police.gov.mv އެވެ.
އަމިއްލަ މައުލޫމާތު ހިއްސާ ނުކޮށްވެސް, މައުލޫމާތު ހިއްސާކުރެވޭނެ ކަމަށް ފުލުހުން ބުންޏެވެ. އަދި މައުލޫމާތު ހިއްސާ ކުރާ ފަރާތްތައް ސިއްރުކޮށްދޭނެ ކަމުގެ ޔަގީންކަންވެސް ފުލުހުން ވަނީ ދީފައެވެ. ބިންވެރިޔާ ސްކީމްގެ ދަށުން އުސޫލާ ހިލާފަށް ބިންތަކެއް ދިން މައްސަލައާ ގުޅިގެބން ގެދޮރުވެރިޔާ ސްކީމްވެސް ހިމެނޭ ގޮތަށް ޖިނާއީ ތަހުގީގެއް ކުރުމަށް ޕީޖީ ވަނީ ފުލުހުންނަށާއި, އޭސީސީ އަށް އަމުރު ކޮށްފައެވެ.
މިމައްސަލައިގެ ކުރިން ހައުސިންގ މިނިސްޓްރީ އާއި ކޮންސްޓްރަކްޝަން މިނިސްޓްރީ ހިންގަމުން އައި އިމާރާތުގައި ރޯވެ އަނދާ ބިމާހަމަވި މައްސަލައިގެ ތަހުގީގަށްވެސް ފުލުހުން ވަނީ ޢާއްމުންގެ އެހީއަށް އެދިފައެވެ. އެމައްސަލައިގެ ތަހުގީގަށް އެހީވުމަށް އިންޑިޔާގެ ޓީމަކުންވެސް ރާއްޖެ އައިސް ފުލުހުންނާއެކު ދަނީ މަސައްކަތް ކުރަމުންނެވެ.
ރިއެކްޝަންސް
