ކަރަންޓުގެ ޚިދުމަތްތެރީންގެ އިޚްލާޞްތެރި މަސައްކަތަށް ސްޓެލްކޯ އެމްޑީގެ ޝުކުރު
ކަރަންޓުގެ ޚިދުމަތްތެރީންގެ އިޚްލާޞްތެރި މަސައްކަތަށް ސްޓެލްކޯ މެނޭޖިންގ ޑިރެކްޓަރ ހުސައިން ފަހުމީ ޝުކުރު އަދާކުރައްވައިފި އެވެ. އެކުންފުނީގެ މެނޭޖިންގ ޑިރެކްޓަރ ކުންފުނީގެ އެހާރާއި މިހާރުގެ ޚިދުމަތްތެރިންގެ އަގުވަޒަންކުރެއްވީ ކުންފުންޏަށް 75 އަހަރު ފުރުން ފާހަގަކުރުމަށް ހިއްސާކުރެއްވި މެސެޖެއްގައެވެ.
ފަހުމީ ވިދާޅުވީ ކަރަންޓުގެ ޚިދުމަތުގެ އަލިމަސްޔޫބީލާއި ހަމަޔަށް ވާސިލްވެފައިވާއިރު، ލިބޭ އެންމެ ބޮޑު ހިތްހަމަޖެހުމަކީ ޤައުމު ބިނާކުރުމާއި، ތަރައްޤީއާއި ތަހުޒީބަށް މަގުފަހިކޮށްދީ، އިންސާނީ އަދި އުމްރާނީ ތަރައްޤީއަށް ކަރަންޓުގެ ޚިދުމަތްތެރީން އިޚްލާޞްތެރިކަމާއެކު ކޮށްދީފައިވާ އަދި ކޮށްދެމުންގެންދާ އަގުހުރި މަސައްކަތްތައް ކަމަށެވެ. މި ކާމިޔާބީގެ ވާހަކަތައް ތާރީޚުގައި ލިޔެވިގެންދާނެކަން ފާހަގަކުރައްވާ ވިދާޅުވީ މި ސިނާއަތުގައި މަސައްކަތްކުރައްވާ މުވައްޒަފުންނާމެދު ފަޚުރުވެރިވެވަޑައިގަންވާ ކަމަށެވެ.
" ޝައްކެއްނެތް ގޮތުގައި، އެކިއެކި ގޮންޖެހުންތަކާ ކުރިމަތިލައްވައިގެން، ކާމިޔާބީގެ ހަރުފަތްތައް ގިރާކުރައްވަމުން އަލިމަސް ޔޫބީލްއާ ހަމައަށް ވާޞިލުވުމުގައި، މި ސިނާއަތުގައި އެކި ދުވަސްވަރު މަސައްކަތްކޮށްދެއްވާފައިވާ ބޭފުޅުން ޤައުމާއި ރައްޔިތުންގެ ކުރިއެރުމަށް ކޮށްދެއްވި ޚިދުމަތްތަކަށާއި، އަދި މިހާރު ތިއްބެވި ބޭފުޅުން މެދުކެނޑުމެއް، ފޫހިކަމެއް އަދި ވަރުބަލިކަމެއްނެތި ކޮށްދެއްވަމުންގެންދަވާ އަގުހުރި ޚިދުމަތްތަކަށް އިޚްލާޞްތެރިކަމާއެކު ޝުކުރު ދަންނަވަން." އެމްޑީ ވިދާޅުވިއެވެ.
ރައީސުލް ޖުމްހޫރިއްޔާ ޑރ. މުޙައްމަދު މުއިއްޒުގެ ވެރިކަމުގައި މި ސިނާއަތުގެ ކުރިމަގު އޮތީ ވަރަށް އުޖާލާކޮށް ކަމަށް ފަހުމީ ވިދާޅުވިއެވެ. ސްޓެލްކޯއިން ދަނީ ހޭލުންތެރި ކުރުމަށާއި, މުވައްޒަފުން ބިނާ ކުރުމަށް ޚާއްޞަ ސަމާލުކަމެއް ދީގެން މަސައްކަތް ކުރަމުންނެވެ.
ރިއެކްޝަންސް
