ބިންވެރިޔާ ހައުސިންގ ސްކީމްއާ ގުޅިގެން ތަހުގީގު ކުރާ މައްސަލާގައި 20 މީހެއްގެ ޕާސްޕޯރޓް ހިފަހައްޓައިފި
ފަޒުލްއާއި އޭނާގެ ބޭބެގެ ޕާސްޕޯރޓް ހިފެހެއްޓި
ބިންވެރިޔާ ހައުސިންގ ސްކީމްއާ ގުޅިގެން ތަހުގީގު ކުރާ މައްސަލާގައި 20 މީހެއްގެ ޕާސްޕޯރޓް ހިފަހައްޓައިފިއެވެ.
ދިވެހި ފުލުހުންގެ ޚިދުމަތުން ބުނީ ފުލުހުން ތަހުގީގު ކުރަމުންގެންދާ ބިންވެރިޔާ ހައުސިންގ ސްކީމްއާ ގުޅުންހުރި މައްސަލައާ ގުޅިގެން ޖުމްލަ 20 މީހަކު ފުރުން މަނާކުރުމުގެ އަމުރު ނެރެފައިވާ ކަމަށެވެ. އެމީހުންގެ ތެރޭގައި ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މެނޭޖިންގ ޑިރެކްޓަރ އިބްރާހީމް ފަޒުލް ރަޝީދު ހިމެނޭކަން ފުލުހުން ޔަގީންކޮށްދެއްވިއެވެ. މީގެއިތުރުން އޭނާގެ ބޭބެ އަދި އެމްޑަބްލިޔުއެސްސީގެ ޑެޕިއުޓީ މެނޭޖިންގ ޑިރެކްޓަރ މުޙައްމަދު ފަޒީލް ރަޝީދުވެސް ހިމެނޭ ކަން ޔަގީންކޮށްދެއްވިއެވެ. އެންމެ ބޮޑު ފާޑުކިއުމެއް އަމާޒުވެފައިވަނީ ފަޒީލް ރަޝީދަށް ހުޅުމާލެއިން ބިން ލިބި, ވަށާފާރުވެސް ރާނާފައިވާތީއެވެ. ފަޒީލް އަކީވެސް ބިންވެރިޔާ ސްކީމްގެ ދަށުން ޝަރުތު ހަމަވާ ފަރާތެއް ނޫނެވެ. އަދި އޭނާއަށް ބިން ދީފައެއްވެސް ނުވެއެވެ. އެކަން ބަޔާންކޮށް ހައުސިންގ މިނިސްޓްރީން ވަނީ އެޗްޑީސީއަށް ސިޓީއެއްވެސް ފޮނުވާފައެވެ. އޭނާގެ އިތުރުންވެސް މާލެއަށް ނިސްބަތްވެސް ނުވާ މީހަކަށް އުސޫލުން ބޭރުން ބިން ދިން މައްސަލަ ސޯޝަލް މީޑިޔާގައި ވަނީ ފެމްނަތި ވެފައެވެ.
މީގެ ފަސް މަސްކުރީގެ މައްސަލަތަކެއްގެ ތަހުގީގު ފެށީ ސޯޝަލް މީޑިޔާގައި އެކަން ޢާއްމުވެ ފާޑުކިއުން އަމާޒުވަމުން ދަނިކޮށެވެ. އެޗްޑިސީން އޮތީ އެކަން ފުލުހުންނަށް ނާންގައެވެ. އެމައްސަލަތައް ފެމްނަތިވުމާ ގުޅިގެން ފުލުހުން ވަނީ އިސްވެ ތަހުގީގު ފަށާފައެވެ. އަދި ޖިނާއީ ތަހުގީގެއް ހިންގަން ޕީޖީން އަމުރުކުރުމާ ގުޅިގެން އޭސީސީންވެސް ވަނި އަވަސް ތަހުގީގެއް ފަށާފައެވެ.
ތަހުގީގު ނިމެންދެން އެޗްޑިސީގެ ބޯޑްގެ ޗެއަރމަން ފިޔަވާ އެހެން މެމްބަރުން ވަނީ ސަސްޕެންޑް ކޮށްފައެވެ. އަދި އެޗްޑިސީގެ މެނޭޖްމަންޓްގެ ބައެއް ވެރިންވެސް ވަނީ ސަސްޕެންޑްކޮށްފައެވެ. ސަރުކާރުން ހާމަނުކުރިނަމަވެސް ހައުސިންގ މިނިސްޓްރީގެ ބައެއް ސިޔާސީ ބޭފުޅުންވެސް މިހާރު ވަނީ ސަސްޕެންޑް ކޮށްފައެވެ. ޕާސްޕޯރޓް ހިފެހެއްޓި މީހުންގެ ތެރޭގައި އެބޭފުޅުން ހިމެނެއެވެ.
ރިއެކްޝަންސް
