ޕީޖީ އަމުރުކުރީ ފްލެޓް ދިނުމުގެ ކަންކަންވެސް ހިމެނޭ ގޮތަށް ބިންވެރިޔާ ސްކީމާ ގުޅޭ ޖިނާއީ ތަހުގީގު ކުރަން
އޭސީސީއާއި ފުލުހުންގެ މައްޗަށްވެސް ވަނީ އަމުރުކޮށްފަ
ބިންވެރިޔާ ސްކީމްގެ ދަށުން ގޯތި ނުލިބޭ ބަޔަކަށް ހުޅުމާލެއިން ގޯތި ދިން މައްސަލަ ފެންމަތިވެ, ވަރަށްބޮޑަށް ފާޑުކިއުން އަމާޒުވެފައި ވަނިކޮށް, އެމައްސަލައިގެ ޖިނާއީ ތަހުގީގެއް ކުރަން ޕްރޮސެކިއުޓަރ ޖެނެރަލް އަމުރު ކުރައްވައިފިއެވެ.
ޕީޖީ އައްބާސް ޝަރީފް އެއަމުރު ކުރެއްވީ ދިވެހި ފުލުހުންގެ ޚިދުމަތާއި އެންޓި ކޮރަޕްޝަން ކޮމިޝަން (އޭސީސީ) ގެ މައްޗަށެވެ. ޕީޖީގެ އަމުރުގައި ވަނީ ބިންވެރިޔާ ސްކީމްގެ އިތުރުން ގެދިރުވެރިޔާ ސްކީމްގެ ޖިނާއީ ތަހުގީގެއް ކުރުމަށްވެސް އަމުރުކުރައްވާފައެވެ. އެއީ މިދިޔަ ސަރުކާރުން އިމާރާތް ކުރަން ފަށާ އެކި މަރުހަލާގައި ހުރި 4000 ފްލެޓް ހިމެނޭ ސްކީމެވެ. އެސްކީމްގެ ދަށުން މިދިޔަ ސަރުކާރުން ފްލެޓް ލިބޭ މީހުންގެ ދާއިމީ ލިސްޓް ގެޒެޓް ކުރިރަސް, މިސަރުކާރުން އެލިސްޓް އަލުން މުރާޖާ ކުރަނީ ގޯސްތަކެއް އުޅޭ ކަމަށް އޭސީސީން ބުނުމުންނެވެ. އަދި ބައެއް ފަރާތްތަކުން ޝަކުވާވެސް ހުށަހަޅާފައި ވަނިކޮށެވެ.
ޕީޖީ ވިދާޅުވީ އެދެސްކީމާ ގުޅިގެންވެސް ޝަކުވާތަކެއް ލިބިފައިވާ ކަމަށެވެ. އެއީ ސްކީމަށް ފޯމް ބަލައިގަތުމާއި, ގޯއްޗާއި ފްލެޓް ލިބޭ މީހުން ކަނޑައެޅުމުގައިވެސް އުޞޫލާ ހިލާފަށް އަމަލުކޮށްފައިވާ ކަމުގެ ޝަކުވާއެވެ. މައްސަލަ ތަހުގީގު ކުރަން ޕީޖީން އަމުރުކުރެއްވީ އެއީ ޢާއްމު މަސްލަހަތު މަތީ ދަރަޖައަށް ހިމެނޭ ކަމަކަށްވާތީ ކަމަށް ޕީޖީން ބުންޏެވެ.
މައްސަލަ ބޮޑަށް ގޯސްވެފައިވަނީ ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިންގ ޑިރެކްޓަރ ފަޒުލް ރަޝީދުގެ ބޭބެއެއް ހިމެނޭ ގޮތަށް އިތުރު މީހަކަށް ގޯތި ދިން މައްސަލައަކާ ގުޅިގެންނެވެ. އެދެމީހުންނަކީވެސް ގޯއްޗަށް ޝަރުތު ހަމަނުވާކަމަށް ކަނޑައަޅާފައިވާ ދެ މީހުންނެވެ.
ފުލުހުންނާއި އޭސީސީންވެސް މައްސަލަ ތަހުގީގު ކުރަން ފަށާފައިވާ ކަމަށް ވަނީ ބުނެފައެވެ. ފުލުހުން ވަނީ ތަހުގީގުގެ ބޭނުމަށް އެޗްޑީސީއަށް ވެސް ވަދެފައެވެ. ނަމަވެސް ފުލުހުން ބުނެފައިވަނީ ތަހުގީގު ކުރަނީ އަމިއްލަ އިސްނެގުމަށް ކަމަށެވެ. ޕީޖީގެ އަމުރުގެ ކުރިން ފުލުހުން ވަނީ ތަހުގީގު ފަށާފައެވެ.
ގެދޮރުވެރިޔާ އާއި ބިންވެރިޔާ ސްކީމްގެ ޖިނާއީ ތަހުގީގެއް ހިންގަން ޕީޖީން އަމުރު ކުރީ ޤާނޫނުން ލިބިދޭ ބާރުގެ ދަށުންނެވެ.
ރިއެކްޝަންސް
