އަޕްޑޭޓް: ސީމެކްސް ބޯޓުން ގެއްލުނު މީހާ ހޯދުމަށް 100 މޭލަށްވުރެ ބޮޑު ސަރަހައްދެއް ބަލައިފިން: އެމް.އެން.ޑީ.އެފް
މި ހާދިސާގައި ގެއްލިފައިވަނީ ސީމެކްސް ބޯޓްގައި މަސައްކަތްކުރާ ބިދޭސީ ފަޅުވެރިއެއްކަމަށްވާ ރާޖް ކުމާރު
އައްޑޫއިން ފުރައިގެން މާލެ ދަތުރުކުރަމުންދިޔަ ސީމެކްސް ބޯޓުން ކަނޑަށް ވެއްޓި ގެއްލުނު މީހާ ހޯދުމަށް 100 ނޯޓިކަލް މޭލަށް ވުރެ ބޮޑު ސަރަހައްދެއް ބަލާފައިވާކަމަށް ޤައުމީ ދިފާޢި ބާރު އެމް.އެން.ޑީ.އެފް އިން ވިދާޅުވެއްޖެއެވެ.
އެމް.އެން.ޑީ.އެފް އިން ވިދާޅުވީ ކަނޑަށް ވެއްޓުނު މީހާ ހޯދުމަށް އައްޑޫ ކަނޑުހިމެނޭ ސަރަހައްދުގައި ހިންގި ޚައްސަ ސާޗް އޮޕަރޭޝަންގައި މިހާތަނަށް 104 ނޯޓިކަލް މޭލުގެ ސަރަހައްދެއް ބަލާފައިވާ ކަމަށެވެ.
މި ހާދިސާގައި ގެއްލިފައިވަނީ ސީމެކްސް ބޯޓްގައި މަސައްކަތްކުރާ ބިދޭސީ ފަޅުވެރިއެއްކަމަށްވާ ރާޖް ކުމާރު ކަމަށެވެ.
އޭނާ ބޯޓްގައި ނެތްކަން އެނގުނީ އައްޑޫ ސިޓީއާއި ފުވައްމުލައް ސިޓީއާ ދެމެދު ކަނޑުމަތިން ފުވައްމުލައް ސިޓީއާ 8 މޭލް އަށް ކައިރިވިފަހުން ކަމަށް ލިބުނު މައުލޫމާތުގެ އަލީގައި ފުލުހުން ވަނީ އިއްޔެ ވިދާޅުވެފައެވެ.
ފުލުހުން ވިދާޅުވި ގޮތުގައި ރާޖު ކުމާރު ގެއްލުނު ކަމުގެ މައުލޫމާތު އެއިދާރާއަށް ލިބުނީ އިއްޔެރޭގެ ވަގުތެއްގައެވެ.
ފުލުހުން ބުނީ ބޯޓް އިއްޔެރޭ 11:30 ގައި އައްޑޫ ސިޓީން ފުރިއިރު ރާޖު ކުމާރު ބޯޓްގައި ހުރި ކަމަށް ވިދާޅުވެފައެވެ. އަދި ދަންވަރު 1:15 ހާއިރު އޭނާ ބޯޓްގެ ކެޕްޓަނާ ވާހަކަދެއްކިކަން އެނގިފައިވާ ކަމަށްވެސް ފުލުހުންވަނީ ކުރިން ވިދާޅުވެފައެވެ.
ރިއެކްޝަންސް
